Summary -

• इंडिगो एअरलाइन्सकडून १००० पेक्षा अधिक पायलटची भरती

• पायलट कमतरतेमुळे पूर्वी अनेक उड्डाणे रद्द करण्यात आली होती

• नवीन भरतीमुळे प्रवाशांना वेळेवर सेवा मिळण्यास मदत होणार

गेल्या काही महिन्यांपासून सतत चर्चेत राहणाऱ्या देशातील सर्वात मोठी इंडिगो कंपनीने एक मोठा निर्णय घेतला आहे. इंडिगो कंपनीने १००० पेक्षा जास्त पायलटची भरती करण्याचा निर्णय घेतला आहे. त्यामुळे इंडिगो कंपनीत पायलट होण्याचे अनेकांचे स्वप्न पूर्ण होणार आहे. गेल्या वर्षी डिसेंबरमध्ये इंडिगो कंपनीला पायलट आणि इतर कर्मचाऱ्यांच्या कमतरतेमुळे सात दिवसांत ५,००० हून अधिक विमान उड्डाणे रद्द करावी लागली होती. आता इंडिगो कंपनीने कामकाज सुव्यवस्थित करण्यासाठी पायलट भरतीचा मोठा निर्णय घेतला आहे.

इकॉनॉमिक टाईम्सने दिलेल्या वृत्तानुसार, इंडिगोच्या भरतीमध्ये प्रशिक्षणार्थी प्रथम अधिकारी, वरिष्ठ प्रथम अधिकारी आणि कॅप्टन यांचा समावेश असणार आहे. जर इंडिगोने ही भरती यशस्वीरित्या पूर्ण केली तर ती भारतीय विमान कंपनीने आतापर्यंत केलेल्या सर्वात मोठ्या भरतींपैकी एक असणार आहे. इंडिगो एअरलाइन तिच्या नेटवर्कचे प्रमुख विमान एअरबस ए३२० वर अनुभव नसलेल्या अर्जदारांनाही कामावर ठेवण्यास तयार असल्याची माहिती समोर आली आहे.

डिसेंबरमध्ये जारी करण्यात आलेल्या एअरलाइनच्या नवीन नियमांनुसार, मध्यरात्री १२ ते सकाळी ६ या वेळेत पायलटने केलेल्या लँडिंगची संख्या मर्यादित करण्यात आली आहे आणि आठवड्याच्या विश्रांतीच्या आवश्यकता देखील वाढवण्यात आल्या आहेत.एका वरिष्ठ अधिकाऱ्याने सांगितले की, एअरलाइन तिच्या वाढत्या विमानाची संख्या लक्षात घेता पायलटची भरती करत आहे. एअरलाइनची अंतर्गत प्रशिक्षण व्यवस्था आधीच मजबूत आहे, दरमहा अंदाजे २० ते २५ प्रथम अधिकाऱ्यांना कॅप्टन म्हणून बढती दिली जाते. एअरलाइन दरमहा चार नवीन विमाने आपल्या ताफ्यात सहभागी करतात.

दरम्यान,नागरी विमान वाहतूक महासंचालनालयाच्या (DGCA) चौकशीत असे आढळून आले की, इंडिगो एअरलाइनने नवीन नियमांची पूर्तता करण्यासाठी पुरेशी भरती केली नव्हती किंवा जलद प्रशिक्षण दिले नव्हते. ज्यामुळे वारंवार बदल्या, दीर्घ कामकाजाचे दिवस आणि दीर्घकाळ निष्क्रिय उड्डाण वेळेद्वारे वैमानिकांवर दबाव निर्माण झाला. इंडिगो एअरलाइन्सला २,४२२ कॅप्टनची आवश्यकता होती. पण या एअरलाइन्सकडे फक्त २,३५७ कॅप्टन होते. यामुळे रोस्टर पूर्णपणे अंमलात आणले गेले नाही आणि त्यांना विमान उड्डाणे रद्द करावी लागली होती. विमान उड्डाण रद्द झाल्यामुळे देशभरातील अनेक विमानतळावर प्रवाशांची मोठी गर्दी झाली होती आणि प्रवाश्यांनी संताप झाले होते.