Jhajjar Haryana well toxic gas incident : एका निष्पाप वासराचा जीव वाचवण्याच्या प्रयत्नात हरियाणात ४ जणांचा करुण अंत झाल्याची घटना समोर आली आहे. एका विहिरीत पडलेल्या वासराला सुरक्षित बाहेर काढण्यासाठी काही लोक एकापाठोपाठ एक विहिरीत उतरले. मात्र, विहिरीच्या तळाशी साचलेल्या अत्यंत विषारी वायूमुळे (Toxic Gas) त्यांचा श्वास गुदमरला आणि चारही जणांचा जागीच दुर्दैवी मृत्यू झाला.

विहिरीतून कोणीही बाहेर येत नसल्याचे पाहून गावकरी मदतीसाठी धावले, पण आत वायू इतका घातक होता की कोणालाही काही समजायच्या आत मोठा अनर्थ घडला. घटनेची माहिती मिळताच पोलिसांनी घटनास्थळी धाव घेऊन मृतदेह बाहेर काढले. एका मुक्या प्राण्याचा जीव वाचवताना ४ जणांनी आपला जीव गमावल्यामुळे संपूर्ण परिसरात प्रचंड हळहळ आणि शोककळा पसरली आहे.

हरियाणाच्या झज्जर जिल्ह्यात सोमवारी एका वासराला वाचवण्यासाठी विहिरीत उतरल्याने चार जणांचा मृत्यू झाला. ही घटना मुनिमपूर गावात घडली. प्राथमिक माहितीनुसार, एक वासरू विहिरीत पडले होते. त्याला वाचवण्याच्या प्रयत्नात काहीजण एकामागून एक विहिरीत उतरले. पण बंद विहिरीत तयार झालेल्या विषारी वायूच्या संपर्कात आल्याने ते बेशुद्ध झाले आणि बाहेर येऊ शकले नाहीत, त्यांचा मृत्यू झाला. मृतांमध्ये दलबीर (४०), नरेंद्र (३८), मोनू (३६) आणि रामू (४०) यांचा समावेश आहे.

घटनेची माहिती मिळाल्यानंतर पोलीस आयुक्त डॉ. राजश्री घटनास्थळी पोहोचल्या. त्यांनी सांगितले की, कायदेशीर कारवाई सुरू करण्यात आली असून, प्रस्थापित कार्यपद्धतीनुसार पुढील कारवाई केली जात आहे.बचाव कार्यादरम्यान, उपनिरीक्षक राजेश कुमार यांनीही अडकलेल्यांना वाचवण्यासाठी विहिरीत प्रवेश केला. त्याच धोकादायक वातावरणाच्या संपर्कात आल्यामुळे त्यांना श्वास घेण्यास तीव्र त्रास होऊ लागला. त्यांना एका खासगी रुग्णालयात दाखल करण्यात आले. पोलिसांनी सांगितले की, त्यांची प्रकृती आता स्थिर आहे.