Madhya Pradesh: मध्य प्रदेशमध्ये (Madhya Pradesh) सैराटची पुनरावृ्ती झाली आहे. प्रमेसंबंधाला विरोध करत 21 वर्षीय तरुण आणि 18 वर्षांच्या तरुणीची निर्घृण हत्या करण्यात आली आहे. धक्कादायक बाब म्हणजे बापानेच आपल्या पोटच्या मुलीचा आणि तिच्या बॉयफ्रेंडची हत्या (Girlfriend And Boyfriend Murder) केली आहे. या घटनेने मध्य प्रदेश हादरले आहे.

मिळालेल्या माहितीनुसार, मध्य प्रदेशच्या मोरेना जिल्ह्यामध्ये ही धक्कादायक घटना घडली आहे. याठिकाणी राहणाऱ्या शिवानी तोमर आणि राधेश्याम तोमर यांची हत्या करण्यात आली आहे. शिवानीच्या कुटुंबीयांनीच त्यांच्यासोबत हे धक्कादायक कृत्य केले आहे. आधी दोघांची गोळ्या झाडून हत्या केली. त्यानंतर दोघांचे मृतदेह दगडाला बांधून मगर असलेल्या नदीमध्ये टाकून दिला. या घटनेमुळे एकच खळबळ उडाली आहे.

शिवानीचे शेजारच्या गावामध्ये राहणाऱ्या राधेश्यामसोबत प्रेमसंबंध होते. पण शिवाजीच्या कुटुंबीयांना त्यांचे नातं मान्य नव्हते. ते या नात्याला विरोध करत होते. राधेश्याम हा बालुपूरा या गावामध्ये राहत होता. राधेश्याम आणि शिवानी गेल्या काही दिवसांपासून बेपत्ता होते. त्यांच्याबद्दल काहीच माहिती मिळत नसल्यामुळे शेवटी राधेश्यामच्या वडिलांनी पोलीस ठाण्यात धाव घेत तक्रार दाखलकेली. त्यानंतर पोलीस तपासात त्यांची निर्घृण हत्या झाल्याचे उघड झाले.

राधेश्यामच्या वडिलांनी त्यांचा मुलगा आणि त्याची गर्लफ्रेंड शिवानीची हत्या झाल्याचा संशय व्यक्त केला होता आणि तो खरा ठरला. पोलिसांना सुरुवातीला वाटले होते की दोघेही पळून गेले असावे. पण ते पळून जात असताना गावातील कोणीच पाहिले नव्हते त्यामुळे पोलिसांनी तपासाची सर्व सूत्र वेगळ्या अँगलने वळवली.

पोलिसांनी शिवानीचे आई आणि वडिलांची चौकशी केली. त्यानंतर त्यांच्या नातेवाईकांना देखील चौकशीसाठी बोलावले. बरीच तास या सर्वांची कसून चौकशी केल्यानंतर त्यांनी शिवानी आणि राधेश्यामची हत्या केल्याची कबुली दिली.

चौकशीमध्ये त्यांनी पोलिसांना सांगितले की, '3 जून रोजी आम्ही शिवानी आणि राधेश्याम यांची गोळ्या झाडून हत्या केली. त्यानंतर त्यांचे मृतदेह दगडांना बांधून चंबल नदीत फेकून दिले.' आपली पोटची मुलगी शिवानी आणि तिचा बॉयफ्रेंड राधेश्याम यांची निर्घृणपणे हत्या केली. हा संपूर्ण घटनाक्रम ऐकल्यानंतर पोलिसांनाही धक्का बसला. या प्रकरणी गुन्हा दाखल करण्याची प्रक्रिया सुरु आहे.

शिवानी आणि राधेश्याम यांची हत्या करुन ज्या चंबळ नदीमध्ये त्यांचा मृतदेह टाक्यात आला होता. त्या नदीमध्ये मोठ्याप्रमाणात मगरी आहेत. या नदीमध्ये दोन हजारांपेक्षा जास्त मगरी आहेत.पोलिसांकडून दोघांचेही मृतदेह शोधण्याचे काम सुरु आहे. पण नदीमध्ये मगरी असल्यामुळे त्यांचे मृतदेह शोधणे खूपच अवघड झाले आहे. या घटनेमुळे मध्य प्रदेश हादरले आहे. या प्रकरणाचा पोलिसांकडून कसून तपास सुरु आहे.