अमेरिकेचे राष्ट्राध्यक्ष डोनाल्ड ट्रम्प यांनी शनिवारी रेड सी शिपिंगवर झालेल्या हल्ल्याला प्रत्युत्तर देण्याचे आदेश अमेरिकन सैन्यांना दिले. डोनाल्ड ट्रम्प त्यांच्या कोणत्याही शत्रूला सोडण्याच्या मनःस्थितीत नाहीत. ट्रम्प यांच्या आदेशानंतर येमेनमध्ये इराण समर्थित हुथी विद्रोहींच्याविरोधात मोठी कारवाई करण्यात आली. हूती विद्रोहींच्या तळावर मोठ्या प्रमाणात लष्करी हल्ले करण्यात आले. या हल्ल्यामध्ये २४ जणांचा मृत्यू झाला.

येमेनमध्ये हुथी बंडखोरांवर अमेरिकन सैन्याने केलेल्या हवाई हल्ल्यात आतापर्यंत २४ जणांचा मृत्यू झाला. डझनभर लोकं जखमी झाल्याची माहिती समोर आली आहे. मृतांचा आकडा वाढण्याची शक्यता आहे. अमेरिकन जहाजांवर केलेला कोणताही हल्ला सहन केला जाणार नाही, असा इशारा डोनाल्ड ट्रम्प यांनी दिला. ट्रम्प यांनी अमेरिकन सैन्याला येमेनमधील हुथी दहशतवाद्यांवर निर्णायक आणि शक्तिशाली लष्करी कारवाई करण्याचे आदेश दिलेत.

येमेनच्या लाल समुद्राच्या प्रदेशाचा बराचसा भाग नियंत्रित करणारे हुथी विद्रोही गाझामधील पॅलेस्टिनींच्या समर्थनार्थ वर्दळीच्या सागरी मार्गाला लक्ष्य करून कारवाया करत आहेत. ट्रम्प यांनी हुथींचा मुख्य समर्थक असलेल्या इराणला तात्काळ या गटाला पाठिंबा देणे थांबवण्याचा इशारा दिला. ट्रम्प यांनी सांगितले की, जर इराणने अमेरिकेला धमकी दिली तर अमेरिका 'तुम्हाला जबाबदार धरेल आणि आम्ही त्याच्याशी चांगले वागणार नाही.'

इस्रायलने गाझामध्ये मानवतावादी मदत थांबवली आहे. यामुळे गाझामधील लोकांपर्यंत अन्न, पाणी आणि औषधे पोहोचत नाहीत आणि २० लाख लोकांवर उपासमारीची वेळ आली आहे. इस्रायलने गाझाला मानवतावादी मदत रोखण्याच्या हालचालीनंतर हुथी दहशतवाद्यांनी इस्रायली जहाजांवर पुन्हा हल्ला करण्याची धमकी दिल्यानंतर हे हल्ले झाले. या गटाने म्हटले आहे की ते लाल समुद्रात सर्व इस्रायली जहाजांच्या हालचालींवर बंदी पुन्हा लागू करत आहेत.