दिल्ली विधानसभा निवडणूक २०२५ साठी आज मतदान होत आहे. दिल्लीचा तख्त कोण जिंकणार याचा फैसला आज होणार आहे. दिल्ली विधानसभेच्या ७० जागांसाठी मतदान होत असून ६९९ उमेदवारांचे भवितव्य आज मतपेटीमध्ये बंद होणार आहे. १.५६ कोटींहून अधिक मतदार मतदानाचा हक्क बजावणार आहेत. सकाळी ७ वाजल्यापासून मतदानाला सुरूवात झाली आहे. मतदान केंद्रावर पोलिसांचा कडेकोट बंदोबस्त तैनात करण्यात आला आहे. मतदान करण्यासाठी मतदान केंद्रावर दिल्लीकरांनी सकाळपासून गर्दी केली आहे.

दिल्लीमध्ये गेल्या १० वर्षांपासून आम आदमी पार्टीची सत्ता आहे. आप तिसऱ्यांदा सरकार स्थापन करण्याचा प्रयत्न करत आहे. तर भाजप आणि काँग्रेस त्यांची स्थिती मजबूत करण्यासाठी रिंगणात आहेत. सकाळी ७ ते सायंकाळी ६ वाजेपर्यंत मतदान प्रक्रिया सुरू राहणार आहेत. चालेल, निमलष्करी दलाच्या २२० कंपन्या, ३५,६२६ पोलिस आणि १९,००० होमगार्ड सुरक्षेसाठी तैनात आहेत. ३,००० संवेदनशील मतदान केंद्रांवर ड्रोनची नजर असणार आहे.

'घरी जाऊन मतदान करा' योजनेअंतर्गत ६,९८० मतदारांनी आधीच मतदान केले आहे. निवडणूक प्रचारादरम्यान 'आप'ने मोफत सुविधांवर भर दिला आहे. भाजपने भ्रष्टाचार आणि कायदा आणि सुव्यवस्थेचे मुद्दे उपस्थित केले, तर काँग्रेसने बेरोजगारी भत्त्याचे आश्वासन दिले. दिल्ली विधानसभा निवडणुकीचा निकाल येत्या ८ फेब्रुवारी रोजी लागणार आहे. दिल्लीवर पुन्हा कोणाची सत्ता येणार याकडे सर्वांचे लक्ष लागले आहे.

आम आदमी पक्षाचे प्रमुख अरविंद केजरीवाल नवी दिल्ली विधानसभा मतदारसंघातून भाजपचे प्रवेश वर्मा आणि काँग्रेसचे संदीप दीक्षित यांच्या विरोधात निवडणूक लढवत आहेत. मुख्यमंत्री आतिशी कालकाजी येथून भाजपचे रमेश बिधुरी आणि काँग्रेसच्या अलका लांबा यांच्या विरोधात निवडणूक लढवत आहेत. दिल्लीमध्ये तिहेरी लढत असून यापैकी कोणता पक्ष बाजी मारतंय हे पाहणं महत्वाचे ठरेल. केंद्रीय गृहमंत्री अमित शहा यांनी दिल्लीतील जनतेला मतदान करण्याचे आवाहन केले आहे.