Scorpio falls into Ganga River in Bihar, 5 people feared dead : बिहारमधील बक्सरमध्ये गंगा नदीवर अपघाताची भयंकर घटना घडली. नदीवरील पुलाचे कठडे तोडून भरधाव वेगात आलेली स्कार्पियो कार थेट नदीमध्ये कोसळळी. कारमधील पाच जणांचा दुर्दैवी मृत्यू झाला आहे. शुक्रवारी रात्री वीर कुंवर सिंह पुलावर ही अपघाताची घटना घडली. गंगा नदीवर रात्रीपासून बचावकार्य सुरू आहे. कारमधील एका व्यक्तीचा मृतदेह बाहेर काढण्यात आला असून इतरांचा शोध घेतला जात आहे.

बिहारहून उत्तर प्रदेशच्या दिशेने जाणारी स्कॉर्पिओ कार शुक्रवारी रात्री गंगा नदीवरील पुलाच्या कठड्याला धडकून नदीत कोसळल्याने मोठी दुर्घटना घडली. ही घटना शुक्रवारी रात्री ८:३० च्या सुमारास घडल्याचे सांगितले जात आहे. प्रत्यक्षदर्शींनुसार, या कारमध्ये पाच ते सहा जण होते. परंतु कारमध्ये नेमके किती प्रवासी होते याची अधिकृत माहिती अद्याप मिळालेली नाही. तसेच, हे प्रवासी कोठून येत होते याबाबतही माहिती समजू शकलेली नाही.

बक्सरमधील अपघाताची माहिती मिळताच प्रशासनाने तातडीने बचावकार्य सुरू केले आहे. स्थानिकांच्या मदतीने गंगा नदीत बुडालेल्या स्कॉर्पिओचा शोध घेण्याचे प्रयत्न सुरू आहेत. अपघातामधील एका व्यक्तीचा मृतदेह मिळाला आहे. इतरांचा शोध घेतला जात आहे. दरम्यान, याआधी महाराष्ट्रातील रत्नागिरीजवळील खेड येथे मुंबई-गोवा महामार्गावरील जगबुडी नदीच्या पुलावरून एका भरधाव कार १००-१५० फूट खाली कोसळली होती. त्या दुर्घटनेत पाच जणांचा जागीच मृत्यू झाला होता.

पोलिसांच्या माहितीनुसार, बेपत्ता व्यक्ती सापडल्यानंतरच मृतांच्या संख्येबाबत अचूक माहिती मिळू शकेल. दुल्हपूर गावात या घटनेची माहिती देण्यात आली आहे. सध्या, बचाव आणि मदत कार्य सुरू आहे. घटनेनंतर घटनास्थळी मोठ्या प्रमाणात गर्दी जमली होती. बचाव कार्यात विविध पथके कार्यरत आहेत. पोलिस बेपत्ता व्यक्तींना लवकरात लवकर शोधण्यासाठी प्रयत्न करत आहेत.