लैंगिक छळाच्या आरोपाखाली अटकेत असलेल्या चैतन्यनंद सरस्वती प्रकरणात मोठी अपडेट समोर आली आहे. चैतन्यनंद सरस्वतीला मदत केल्याच्या आरोपाखाली दिल्ली पोलिसांनी श्री शारदा इन्स्टिट्यूट ऑफ इंडियन मॅनेजमेंटच्या ३ महिला अधिकाऱ्यांना अटक केली. आरोपी श्वेता शर्मा (असोसिएट डीन), भावना कपिल (कार्यकारी संचालक) आणि काजल (वरिष्ठ विद्याशाखा) यांच्यावर चिथावणी देणे, धमक्या देणे आणि पुरावे नष्ट करणे असे आरोप करण्यात आले असून दिल्ली पोलिसांनी त्यांच्याविरोधात गुन्हे दाखल करत त्यांना अटक केली.

दिल्ली पोलिसांनी अटक केलेल्या तिन्ही महिलांना आरोपी चैतन्यानंद सरस्वती समोर चौकशी केली. तेव्हापासून पोलिस त्यांना अटक करण्याची तयारी करत होते. गुरुवारी दिल्ली पोलिसांचे एक पथक उत्तराखंडमधील अल्मोडा येथील गेस्ट हाऊसमध्ये चौकशीसाठी गेले होते. पोलिसांनी गेस्ट हाऊस आणि इतर ठिकाणी छापे टाकून आरोपींविरुद्ध पुरावे गोळा केले होते.

श्री शारदा इन्स्टिट्यूट ऑफ इंडियन मॅनेजमेंटचे माजी प्रमुख चैतन्यनंद सरस्वती यांच्या अटकेनंतर वसंत कुंज उत्तर पोलिस ठाण्याने आता त्यांच्या सहकाऱ्यांवर कारवाई करण्यास सुरूवात केली आहे. गुरुवारी पोलिसांनी तीन महिला अधिकाऱ्यांना अटक केली ज्यांच्यावर विद्यार्थिनींना बाबाच्या कार्यालयात नेण्याचा आणि नकार दिल्यास धमकावण्याचा आरोप आहे. तिघीही बहिणी आहेत आणि त्यांच्या नियुक्त्यांवरही चौकशी केली जात आहे.

या तिन्ही बहिणी चैतन्यनंद सरस्वती यांच्या सर्वात जवळच्या मानल्या जात आहेत. पोलिसांनी तिन्हींवर पुरावे नष्ट करण्याचा आरोपही लावला आहे. पोलिस सूत्रांचे असे म्हणणे आहे की, स्वामीच्या मोबाईलवरून आतापर्यंत मिळालेल्या सर्व पुराव्यांच्या आधारे विद्यार्थ्यांनी तिन्ही बहिणींवर केलेले सर्व आरोप खरे ठरले आहेत. तिन्ही बहिणींवर विद्यार्थ्यांचे मोबाईल फोन जबरदस्तीने घेतल्याचा, त्यांच्याकडून स्वामीसोबतचे चॅट्स डिलीट केल्याचा आणि फरार असताना संस्थेतून महत्त्वाची कागदपत्रे गायब केल्याचा, तसेच सीसीटीव्ही फुटेज डिलीट केल्याचा आरोप आहे.

तिन्ही बहिणींना अटक केल्यानंतर पोलिसांनी त्यांची बराच वेळ चौकशी केली. चौकशीदरम्यान तिन्ही बहिणींनी आरोपी स्वामीच्या सूचनांचे पालन केल्याची कबुली दिली. चौकशीदरम्यान, शिस्त आणि वक्तशीरपणाच्या नावाखाली त्यांनी विद्यार्थ्यांवर दबाव आणल्याचेही उघड झाले. दिल्ली पोलिसांच्या सूत्रांनी सांगितले की, ज्यांनी स्वामीला हॉटेल बुक करण्यास आणि पळून जाण्यासाठी आर्थिक मदत केली त्यांना लवकरच अटक केली जाईल.