Summary -

• बिहारमध्ये नितीश कुमार १० व्यांदा मुख्यमंत्री होणार आहेत

• भाजपाने उपमुख्यमंत्रीपदासाठी सम्राट चौधरी आणि विजय सिन्हा यांचीच निवड केली

• २० नोव्हेंबर २०२५ रोजी गांधी मैदानात शपथविधी होईल

बिहारमध्ये नवीन सरकार स्थापनेच्या प्रक्रियेला वेग आला आहे. जेडीयू विधिमंडळ पक्षाच्या बैठकीत नितीश कुमार यांची नेतेपदी निवड करण्यात आली. त्यानंतर भाजप विधिमंडळ पक्षाच्या बैठकीत सम्राट चौधरी यांची नेतेपदी निवड करण्यात आली आणि विजय सिन्हा यांची उपनेतेपदी निवड करण्यात आली. नितीश कुमार हे १० व्यांदा बिहारचे मुख्यमंत्री होणार आहेत. तर भाजपने बिहारमध्ये कोणताच बदल न करण्याचा निर्णय घेतला आहे. बिहारमध्ये सम्राट चौधरी आणि विजय सिन्हा हे आधीप्रमाणेच उपमुख्यमंत्री राहणार आहेत. उद्या शपथविधी सोहळा होणार असून याकडे सर्वांचे लक्ष लागले आहे.

नितीश कुमार हे २० नोव्हेंबरला बिहारच्या मुख्यमंत्रिपदाची शपथ घेणार आहेत. नितीश कुमार यांच्यासोबत सम्राट चौधरी आणि विजय सिन्हा हे उपमुख्यमंत्रिदाची शपथ घेतील. उपमुख्यमंत्रिपदासाठी भाजपकडून अनेक नावांची चर्चा होती. सम्राट चौधरी, मंगल पांडे, दिलीप जयस्वाल आणि विजय कुमार सिन्हा हे उपमुख्यमंत्रिपदाचे दावेदार होते. विजय सिन्हा यांचे नाव सभापती आणि प्रदेशाध्यक्ष पदासाठी देखील घेतले जात होते. पण भाजपने उपमुख्यमंत्रिपदासाठी सम्राट चौधरी आणि विजय सिन्हा यांची निवड केली आहे.

आज विधिमंडळ पक्षाच्या बैठकीत सम्राट चौधरी यांची नेतेपदी निवड झाली. तर विजय सिन्हा यांची उपनेतेपदी निवड झाली. दोघेही उपमुख्यमंत्री होणार आहेत. सम्राट पूर्वी नेतेपदावर होते आणि विजय सिन्हा उपनेतेपदावरच होते. त्यामुळे सत्तेत परतल्यानंतर भाजपने कोणताही बदल न करण्याचा निर्णय घेतला आहे. त्यामुळे दोन्ही नेत्यांवर सध्या शुभेच्छांचा वर्षाव होत आहे.

नितीश कुमार यांची जेडीयू विधिमंडळ पक्षनेतेपदी पुन्हा निवड झाली आहे आणि ते गुरुवारी सकाळी ११:३० वाजता मुख्यमंत्रीपदाची शपथ घेतील. त्यांच्यासोबत सम्राट चौधरी आणि विजय सिन्हा हे देखील गांधी मैदानात उपमुख्यमंत्रिपदाची शपथ घेतील. सध्या अशी चर्चा आहे की, गांधी मैदानात एकूण २० मंत्री शपथ घेऊ शकतात. यानंतरही मंत्रिमंडळ विस्तार होण्याची शक्यता आहे. जेडीयू, भाजप आणि मित्रपक्षांमधील जुने आणि नवीन दोन्ही चेहरे मंत्रिमंडळात दिसण्याची शक्यता आहे.