कोलकाता बलात्कार आणि हत्येप्रकरणी भारतीय जनता पक्षाने (भाजप) आज (बुधवार) 12 तासांसाठी पश्चिम बंगाल बंदची घोषणा केली आहे. राज्याचे भाजप नेते सुवेंदू अधिकारी यांनी ममता बॅनर्जी यांच्या नेतृत्वाखालील टीएमसी सरकारला नबन्ना अब्बियान रॅलीदरम्यान झालेल्या हिंसाचारासाठी जबाबदार धरले आहे. राज्यात घडलेल्या घटनेच्या निषेधार्थ आणि रॅलीवर केलेल्या लाठीचार्जवरून भाजप नेत्याने ममता बॅनर्जी यांच्या राजीनाम्याची मागणी केलीय.

भाजपने आज 12 तासांचा बंद पुकारला आहे हा बंद सकाळी 6 ते संध्याकाळी 6 पर्यत असणार आहे. मात्र ममता बॅनर्जी सरकारने या बंदला परवानगी देण्यास स्पष्ट नकार दिला आहे. पश्चिम बंगाल सरकारने सर्वसामान्य जनतेला भाजप बंदमध्ये सहभागी न होण्याचे आवाहन केलंय. मुख्यमंत्री ममता बॅनर्जी यांचे मुख्य सल्लागार अलपन बंदोपाध्याय यांनी मंगळवारी सांगितले की, सरकार बुधवारी कोणत्याही बंदला परवानगी देणार नाहीये. आम्ही लोकांना यात सहभागी न होण्याचे आवाहन करत आहोत. सामान्य जनजीवन प्रभावित होऊ नये यासाठी सरकार सर्व पावले उचलेल,असल्याचं ते म्हणाले.

दरम्यान, राष्ट्रपती राजवटीची मागणी सुवेंदू अधिकारी यांनी केली. विद्यार्थ्यांनी पुकारलेल्या निदर्शनांदरम्यान झालेल्या हिंसाचारासाठी ममता बॅनर्जी जबाबदार असल्याचा आरोपदेखील त्यांनी केला. कोलकाता येथील एका प्रशिक्षणार्थी डॉक्टरच्या बलात्कार आणि हत्येमध्ये गुंतलेल्यांना संरक्षण पश्चिम बंगालच्या मुख्यमंत्री ममता बॅनर्जी देत असल्याचा आरोप अधिकारी यांनी केलाय. ममता बॅनर्जी यांच्यावर आरोप करतांना भाजपने त्यांना “हुकूमशहा” म्हटलंय. या प्रकरणाची निष्पक्ष चौकशी करण्यासाठी बॅनर्जी यांनी राजीनामा द्यावा अशी मागणी सुवेंद्र अधिकारी यांनी केलीय.

भाजपने सीबीआयने बॅनर्जी आणि पोलीस आयुक्त विनीत गोयल यांची पॉलीग्राफ चाचणी घ्यावी अशी मागणी भाजपने केलीय. पीडितेचा मृत्यू हा आत्महत्येने झाल्याची माहिती पोलिसांनी सुरुवातीला दिली होती. पश्चिम बंगालच्या मुख्यमंत्री ममता बॅनर्जी यांनी राजमीनामा द्यावा. आरजी कार हॉस्पिटलमधील डॉक्टरच्या बलात्कार-हत्येला जबाबदार असलेल्यांना अटक करावी, या मागणीसाठी शेकडो आंदोलककर्त्यांनी प्रामुख्याने तरुणांनी मंगळवारी दुपारी शहरभरात दोन ठिकाणी 'नबान्ना अभिजन' आंदोलन केले.