• आसाममध्ये मुसळधार पावसामुळे पूर

• पूर आणि भूस्खलनामुळे गंभीर परिस्थिती निर्माण झाली आहे

• या पावसामुळे आतापर्यंत ४१ जणांचा मृत्यू झाला

• पावसामुळे ११ जिल्ह्यांतील लाखो नागरिक प्रभावित झालेत

देशभरात पावसाचा कहर सुरूच आहे. ढगफुटी, पूर आणि भूस्खलनामुळे अनेकांचा मृत्यू होत आहे. आसाममध्ये पावसाचा हाहाकार सुरू आहे. आसाममध्ये महापुरासारखी परिस्थिती निर्माण झाली आहे. पावसामुळे जनजिवन पूर्णत: विस्कळीत झाले आहे. या पावसाने एकाच दिवसात १० जणांचा मृत्यू झाला आहे. आसाममध्ये आतापर्यंत पावसाने ४१ जणांचा बळी घेतला आहे. मृतांचा आकडा वाढत चालला आहे. आसामसाठी पुढील काही तास महत्वाचे असणार आहे. हवामान खात्याने अतिमुसळधार पाऊस पडण्याचा इशारा दिला.

आसाममध्ये ढगफुटीसदृश्य परिस्थिती आहे. चराईदेव, शिवसागर, जोरहाट आणि गोलाघाट जिल्ह्यांमध्ये सर्वात जास्त पाऊस पडत असून मोठं नुकसान झाले आहे. आसाममधील पुराची परिस्थिती गंभीर आहे. आतापर्यंत ४१ जणांचा मृत्यू झाला आहे आणि ११ जिल्ह्यांमधील ६५ लाखांहून अधिक लोक प्रभावित झाले आहेत. लष्कर, हवाई दल आणि इतर यंत्रणा मदत आणि बचाव कार्य करत आहे.

आसामच्या दुर्गम भागात देखील पावसामुळे मोठं नुकसान झालं आहे. याठिकाणी अडकलेल्या लोकांपर्यंत जीवनावश्यक वस्तू पोहोचवण्यासाठी ड्रोनचाही वापर केला जात आहे. या ईशान्येकडील राज्यातील अनेक प्रमुख नद्यांनी धोक्याची पातळी ओलांडली आहे. मुख्यमंत्री हिमंता बिस्वा सरमा आज गोलाघाट जिल्ह्यातील सर्वाधिक प्रभावित भागांना भेट देणार आहेत. त्यांनी बुधवारी जोरहाट आणि शिवसागर येथील बचाव कार्याचा आढावा घेतला आणि पूरग्रस्तांशी संवाद साधला.

दरम्यान, आसामच्या ११ जिल्ह्यांना पावसामुळे चांगलाच तडाखा बसला आहे. विनाशकारी पुरामुळे ३,६०,००० हून अधिक नागरिकांना फटका बसला. ब्रह्मपुत्रा, डिकोह, देसांग आणि धनसिरी यांसारख्या अनेक प्रमुख नद्यांनी धोक्याची पातळी ओलांडली आहे. नदी-नाले दुथडी भरून वाहत आहेत. हवामान खात्याने हा मुसळधार पाऊस लक्षात घेता नागरिकांनी काळजी घ्यावी आणि सतर्क राहावे असे आवाहन केले आहे.