Plane Crash Accident : अहमदाबादच्या सरदार वल्लभभाई पटेल आंतरराष्ट्रीय विमानतळावरुन उड्डाण केल्यानंतर एअर इंडियाचे बोईंग ७८७ ड्रीमलायनर (एआय १७१) विमान खाली कोसळले. एअर इंडियाचे हे विमान मेघानीनगरमधील मेडिकल कॉलेज कॉम्प्लेक्समध्ये कोसळले. या दुर्घटनेमध्ये विमानातील २४१ जणांचा मृत्यू झाला. विश्वास कुमार रमेश हे प्रवासी या अपघातात वाचले. एअर इंडिया विमान अपघातात मृत्युमुखी पडलेल्यांमध्ये एका क्रिकेटपटूचा समावेश असल्याची माहिती समोर आली आहे.

मिळालेल्या माहितीनुसार, अहमदाबादहून लंडनला जाणाऱ्या बोईंग ७८७-८ ड्रीमलायनर विमान दुर्घटनेमध्ये २३ वर्षीय क्रिकेटपटू दीर्घ पटेलचाही समावेश असल्याचे म्हटले जात आहे. दीर्घ पटेल हा मूळचा गुजरातचा होता. हडर्सफील्ड विद्यापीठात कृत्रिम बुद्धिमत्तेत एमएससी पूर्ण केल्यानंतर दीर्घ लीड्स मॉडर्नियन्स क्रिकेट क्लबकडून खेळला होता. २०२४ मध्ये २०२४ मध्ये पदव्युत्तर पदवी घेत असताना त्याने २० सामन्यांमध्ये पहिल्या इलेव्हनसाठी ३१२ धावा केल्या आणि २९ बळी घेतले होते.

दीर्घ पटेल हा अहमदाबादवरुन लंडनला जाणाऱ्या एअर इंडिया विमानात होता. विमान जेव्हा खाली कोसळले, तेव्हा मोठा स्फोट झाला. अपघातामध्ये दीर्घ पटेलचा मृत्यू झाल्याची माहिती समोर आली आहे. हडर्सफील्ड विद्यापीठातील प्राध्यापकांनी आणि त्याच्या क्रिकेट क्लबने दीर्घ पटेलला श्रद्धांजली वाहत दु:ख व्यक्त केले आहे.

गुजरातच्या अहमदाबादमध्ये १२ जून रोजी मोठी दुर्घटना घडली. एअर इंडियाच्या प्रवासी विमानाने दुपारच्या सुमारास उड्डाण केले. उड्डाणानंतर हे विमान अवघ्या काही सेकंदांमध्ये मेघानीनगर परिसरात कोसळले. अपघाताच्या वेळी विमानात २४२ जण होते. यातील २४१ जणांचा अपघातात जीव गेला. तर विमान दुर्घटनेने मेघानीनगरमधील ३० हून अधिक जणांचा बळी घेतला.