Summary -

• राजस्थानच्या बालोतरा जिल्ह्यात भीषण अपघात

• खासगी बस आणि ट्रेलरची जोरदार धडक

• अपघातात ६ जणांचा जागीच मृत्यू

• तर ७ जण गंभीर जखमी झाले आहेत

राजस्थानमध्ये भीषण रस्ते अपघातामध्ये ७ जणांचा मृत्यू झाल्याची घटना घडली. जोधपूरवरून सांचौरला जाणाऱ्या एका खासगी बसने ट्रेलरला धडक दिली. ही अपघाताची घटना बालोतरा जिल्ह्यातील कल्याणपुर क्षेत्रमध्ये घडली. सरवडी गावाजवळ ओव्हरटेक करत असताना बस आणि ट्रेलरची जोरदार धडक झाली. या अपघातामध्ये सहा प्रवाशांचा जागीच मृत्यू झाला तर सात जण गंभीर जखमी झाले आहेत.

या अपघातामध्ये बस ड्रायव्हरच्या बाजूचा भाग पूर्णपणे क्षतिग्रस्त झाला आहे. ही टक्कर इतकी जोरदार होती की बसच्या काचा तुटल्या आणि अनेक प्रवासी आतमध्ये अडकले. या अपघातानंतर स्थानिक नागरिकांनी घटनास्थळी धाव घेत बचावकार्य केले. स्थानिकांनी बसचा आपत्कालीन दरवाजा आणि तुटलेल्या काचांमधून प्रवाशांना बाहेर काढले. या अपघातामध्ये जखमी झालेल्यांना तात्काळ बालोत्रा येथील रुग्णालयात दाखल केले. गंभीर जखमींना पुढील उपचारासाठी जोधपूरच्या एमडीएम रुग्णालयात हलवण्यात आले.

एसीपी छावी शर्मा यांनी सांगितले की, अपघातात ६ जणांचा मृत्यू झाला आहे. मृतांमध्ये पाना देवासी (सायला) यांचा मुलगा नागराम, भगवानराम (संचोर) यांची मुलगी अनुषा, नरपत (चितळवाना), युवराज (५ वर्षे) आणि शिवराज (१५ महिने) यांचा समावेश आहे. तर एका मृतदेहाची ओळख अद्याप पटलेली नाही.

पोखरण सरकारी रुग्णालयातील नर्सिंग सदस्य धारू राम यांनी सांगितले की, ते त्यांच्या कुटुंबासह घरी परत येत होते. अपघातात त्यांच्या दोन्ही मुलांचा जागीच मृत्यू झाला. तर त्यांची बायको गंभीर जखमी झाली आणि तिचा पाय कापावा लागला. या अपघातामध्ये जखमी झालेल्या अनेकांची प्रकृती चिंताजनक आहे. त्यामुळे मृतांचा आकडा वाढण्याची शक्यता व्यक्त केली जात आहे.