Dhule Accident : काळीज पिळवटून टाकणारी घटना, भीषण अपघातात बापलेकाचा करूण अंत, मायलेक गंभीर जखमी

भूषण अहिरे, धुळे | साम टीव्ही प्रतिनिधी

मुंबई-आग्रा महामार्गावर धुळ्याजवळ अवधान गावाजवळ काळीज पिळवटून टाकणारी दुर्घटना घडली. धुळ्याहून मालेगावकडे जाणाऱ्या लेनवर एका हॉटेलसमोरच भरधाव ट्रकने दुचाकीला पाठीमागून जोरदार धडक दिली. या भीषण अपघातात दुचाकीस्वार लक्ष्मण निंबा गुंजाळ (वय ३५) आणि त्यांचा अवघा तीन वर्षांचा मुलगा आदित्य लक्ष्मण गुंजाळ या दोघांचा जागीच मृत्यू झाला.

लक्ष्मण गुंजाळ हे आपल्या पत्नी आणि दोन मुलांसह दुचाकीने गाणेगावकडे जात होते. त्याचवेळी अवधान गावच्या हद्दीत त्यांच्यावर काळाने झडप घातली. ट्रकने त्यांच्या दुचाकीला मागून धडक दिली. यात लक्ष्मण यांच्यासह त्यांचा अवघ्या तीन वर्षांचा मुलगा आदित्य जागीच मरण पावला.

या अपघातामध्ये लक्ष्मण यांच्या पत्नी भाग्यश्री लक्ष्मण गुंजाळ (वय ३०) आणि त्यांची दीड वर्षाची मुलगी जयश्री या दोघी गंभीर जखमी झाल्या आहेत. या अपघाताची माहिती मिळताच मोहाडी नगर पोलिसांनी तातडीने घटनास्थळी धाव घेतली. पोलिसांनी स्थानिक नागरिकांच्या मदतीने जखमींना तात्काळ धुळे जिल्हा रुग्णालयात उपचारासाठी नेले. अवधान गावाजवळ झालेल्या या अपघातानंतर पोलिसांनी ट्रक जप्त केला. तसेच चालकाला ताब्यात घेतलं.