Summary -

• दाट धुक्यामुळे यमुना एक्सप्रेस वेवर विचित्र अपघात

• ८ बस आणि ३ कारची एकमेकांना धडक

• वाहनांना आग लागल्याने अनेक प्रवासी जिवंत जळाले

• अपघातामध्ये १३ जणांचा मृत्यू तर १०० हून अधिक जण जखमी

मथुरामध्ये भयंकर अपघाताची घटना घडली. दाट धुक्यांमुळे यमुना एक्स्प्रेस वेवर विचित्र अपघात झाला. ८ बस आणि ३ कार एकमेकांवर धडकल्या. अपघातानंतर वाहनांना आग लागली. या आगीमध्ये होरपळून आतापर्यंत १३ जणांचा मृत्यू झाला. तर १०० हून अधिक जण जखमी झाले आहेत. पोलिस या अपघाताचा तपास करत आहेत.

ही घटना बलदेव पोलिस ठाण्याच्या हद्दीत १२७ किमी माइलस्टोनजवळ झाला. मध्यरात्री ३.३० वाजता ही घटना घडली. हा अपघात इतका भीषण होता की झोपेमध्येच अनेकांचा जीव गेला. दाट धुक्यांमुळे हा अपघात झाला असल्याची माहिती प्रत्यक्षदर्शींनी दिली. दाट धुक्यांमुळे एक एक करत ८ बस आणि ३ कारची जोरदार धडक झाली. अपघातानंतर अनेक वाहनांनी पेट घेतला. या आगीमध्ये होरपळून अनेक प्रवाशांचा जीव गेला. वाहनांना आग लागल्यामुळे प्रवाशांना बाहेर पडता आले नाही. घटनास्थळी किंचाळ्या, आग अन् धुराचे लोट पसरले होते.

अग्निशमन दलाने घटानास्थळी धाव घेत आग विझवली आणि जखमींना बाहेर काढले. या अपघातामध्ये १३ जणांचा मृत्यू तर १०० हून अधिक जखमी झाले आहेत. जखमींना वेगवेगळ्या रुग्णालयात दाखल करण्यात आले आहे. पोलिस घटनास्थळावरून १७ बॅगमध्ये हाडांचे सांगाडे आणि जळालेले मृतदेह घेऊन गेले. मृतदेहांची ओळख पटवणे देखील कठीण झाले आहे. ४ जणांची ओळख पटली आहे तर इतर मृतदेहांची ओळख पटवण्याचे काम सुरू आहे.

जखमींना मथुरा येथील जिल्हा रुग्णालय आणि वृंदावन येथील रुग्णालयात दाखल करण्यात आले आहे. गंभीर जखमींना आग्रा येथील एसएन मेडिकल कॉलेजमध्ये रेफर करण्यात आले आहे. ३८ जणांना जिल्हा रुग्णालयात दाखल करण्यात आले आहे. ३९ जणांना बलदेव सीएचसीमध्ये दाखल करण्यात आले आहे. जखमींमधील अनेकांची प्रकृती चिंताजनक आहे त्यामुळे मृतांचा आकडा वाढण्याची शक्यता आहे.