Expressway Accident : हायवेवर पहाटे काळाचा घाला, ७ बसे अन् ३ कार जळून खाक, ७ जणांचा जळून मृत्यू, २५ गंभीर जखमी

Yamuna Expressway fire accident news : उत्तर प्रदेशातील मथुरेत पहाटे भयंकर अपघात झालाय. सात बसेस अन् ३ कारचा विचित्र अपघात झाल्याने आगीचा भडका उडाला. या अपघातात ७ जणांचा जळून मृत्यू झाल्याची भीती व्यक्त करण्यात येत आहे. ४ जणांचे मृतदेह बाहेर काढण्यात आले आहे. या अपघातामध्ये २५ जण जखमी झाले असून त्यांना रूग्णालयात उपचारासाठी दाखल कऱण्यात आले आहे. यमुना एक्सप्रेसवेवर दाट धुक्यामुळे हा अपघात झाल्याचा अंदाज पोलिसांनी वर्तवलाय.

उत्तरेकडे सध्या थंडीचा कडाका वाढलाय. दाट धुक्यामुळे आज पहाटे यमुना एक्सप्रेसवेवर काळाने घाला घातला. दोन वाहनांची एकमेंकाना जोरात धडक झाली. त्यानंतर मागे असणाऱ्या इतर काही गाड्याही धडकल्या. यामध्ये सात बस आणि तीन कार जळून खाक झाल्याची प्राथमिक माहिती मिळाली आहे. या दुर्घटनेत सहा ते सात जणांचा जळून मृत्यू झाल्याचा प्राथमिक अंदाज वर्तवला जातोय. आतापर्यंत ४ जणांचे मृतदेह पोस्टमार्टमसाठी पाठवण्यात आले आहेत. दुर्घटनेत २५ जण जखमी झाले आहेत. त्यांच्यावर जवळच्या रूग्णालयात उपचार सुरू आहे.

अपघातानंतर बसेस अन् कारला आग लागल्यानंतर घटनास्थळी आरडाओरडा आणि किंचाळ्याने परिसर हादरला होता. या दुर्घटनेची माहिती मिळताच पोलिस आणि जिल्हा प्रशासन घटनास्थळी दाखल झाले आणि बचाव कार्य सुरू केले. मथुरा जिल्हा अधिकाऱ्यांनी या दुर्घटनेत ४ जणांच्या मृत्यूची माहिती दिली आहे. घटनास्थळावर अद्याप बचावकार्य सुरू आहे. अपघातानंतर ब्लॉक केलेला महामार्ग पुन्हा सुरू करण्यासाठी आणि अडकलेल्या प्रवाशांची वाहतूक करण्यासाठी प्रयत्न सुरू आहेत. जखमींना उपचारासाठी रुग्णालयात पाठवण्यात आले आहे.

आज पहाटे ४ वाजण्याच्या सुमारास दाट धुक्यामुळे यमुना एक्सप्रेसवेवर सात बसेस आणि तीन कार यांची जोरात धडक झाली अन् आगीचा भडका उडाला. पहाटेची वेळ असल्याने बहुतेक प्रवासी झोपेत होते. कोणालाही काही समजण्यापूर्वीच आग भडकली अन् त्यांच्यापर्यंत पोहोचली होती. सहा ते सात जण जिवंत जळाल्याचे वृत्त आहे. स्थानिक सरकारी अधिकाऱ्यांकडून चार जणांच्या मृत्यूची पुष्टी केली आहे. मृतदेह पोस्टमार्टमसाठी रूग्णालयात पाठवण्यात आले आहेत.