Mumbai Dam Water Level: गेल्या दोन ते तीन आठवड्यापासून राज्यात पावसाने पाठ फिरवली आहे. त्यामुळे धरणक्षेत्रात येणाऱ्या पाण्याची आवक मंदावली आहे. राज्यातील बहुतांश धरणे पाण्याअभावी रिकामीच आहे. मात्र, प्रमुख शहरांमधील धरणे भरल्याने पिण्याच्या पाण्याचा प्रश्न मिटला आहे. मुंबईला पाणीपुरवठा करणाऱ्या ७ तलावांतील पाललोट क्षेत्रातील पाणीसाठा समाधानकारक आहे. (Latest Marathi News)

या सातही धरणातील पाणीसाठी ९० टक्क्यांवर पोहोचला आहे. शहराला सर्वाधिक पाणीपुरवठा करण्याऱ्या भातसा तलावातील पाणीसाठा देखील ८७ टक्क्यांवर पोहचल्याची माहिती आहे. तर अप्पर वैतरणा तलावात मात्र सर्वांत कमी पाणीसाठा जमा झाला झाले. या तलावात ७७ टक्के इतकाच पाणीसाठा आहे.

दिलासादायक बाब म्हणजे शहराला पाणीपुरवठा (Water Supply) करणारे मोडकसागर, तानसा, विहार, तुळशी हे चार तलाव सध्या भरले आहेत. तर अप्पर वैतरणा, मध्य वैतरणा आणि भातसा तलाव अद्यापही भरणे बाकी आहे. हे तलाव भरण्यासाठी किमान दीड लाख दशलक्ष लिटर पाण्याची आवश्यकता आहे.

मुंबईत पुन्हा पाणीकपात लागू होणार?

शहराला पाणीपुरवठा (Mumbai Water) करणारे सर्व सातही तलाव पूर्ण क्षमतेने भरण्यासाठी जवळपास १४ लाख ४७ हजार दशलक्ष लिटर पाण्याची आवश्यकता असते. गेल्या १५ वर्षांत दोन वेळा तलाव ९० टक्केच भरल्याने वर्षभर १० टक्के पाणीकपात करावी लागली होती.

मात्र, यंदा पहिल्याच पावसात धरणांमधील पाणीसाठा वाढल्याने पाणीकपातीचा निर्णय मागे घेण्यात आला. आता एका महिन्यात जर समाधानकारक पाणीसाठा जमा झाला, तर ही पाणीकपात रद्द राहिल, अन्यथा शहराला वर्षभर १० टक्के पाणीकपातीचा सामना करावा लागू शकतो, असं एका अधिकाऱ्याने नाव न घेण्याच्या अटीवर सांगितले.

तलावातील पिण्यायोग्य पाणीसाठा (दशलक्ष लिटरमध्ये)

अपर वैतरणा : १,७४,९९९

मोडक सागर : १,२८,९१०

तानसा : १,४३,७१०

मध्य वैतरणा : १,८७,४५१

भातसा : ६,६६,३८

विहार : २७,६९८

तुळशी : ८,०४६

Edited by - Satish Daud