Maval News : जनरल मोटर्सच्या कामगारांचे प्रश्न राज्य सरकारने सोडवले नाहीत तर बेराेजगारीच्या छायेत लाटणा-या सत्ताधा-यांना कामगारांचा आणि त्यांच्या कुटुंबाचा शाप लागेल असे विराेधीपक्ष नेते विजय वडेवट्टीवार यांनी म्हटले. तळेगावात साखळी उपोषणास बसलेल्या जनरल मोटर्सच्या कामगारांना पाठिंबा दर्शविण्यासाठी वडेवट्टीवर आले होते. त्यावेळी त्यांनी सरकारवर टीका केली. (Maharashtra News)

विजय वडेट्टीवार म्हणाले तळेगाव एमआयडीसी ही विलासराव देशमुख यांनी सर्वांगीण विकासासाठी उभी केली. जनरल मोटरला टॅक्समध्ये सवलत देऊन महाराष्ट्रात उद्योगांना चालना मिळावी म्हणून फुकटात जमीन दिली. आता ती कंपनी बंद पडली आहे. यामुळे हजारो कामगार बेरोजगार झाले आहेत.

याबाबतचे पत्र देवेंद्र फडणवीस यांनी महाविकास आघाडीच्या काळात विरोधीपक्ष नेते असताना मंत्री सुरेश खाडे यांना दिलं होते. त्यांनी पत्र पाहिले पाहिजे होत आणि कामगारांच्या भावना जाणून घ्यायला होत्या. तसं न करता कंपनीला क्लोजर मंजुरी दिली. सुरेश खाडे हे दुतोंडी सापासारखे आहेत असं म्हणत विरोधी पक्षनेते विजय वडेट्टीवार यांनी भाजपवर निशाणा साधला.

सुरेश खाडे यांनी घेतलेला निर्णय हा बेकायदेशीर आहे. हा निर्णय का घेतला त्यांना कुणाचा फोन आला? की मलिदा मिळाला हे पाहावं लागेल असेही विजय वडेट्टीवार यांनी नमूद केले विधानसभेत हा प्रश्न आम्ही लावून धरणार असल्याचे त्यांनी म्हटले आहे.

जनरल मोटर बंद पडल्याने हजारो कामगारांवर बेकारीची कुऱ्हाड आली आहे. असं असताना राज्यातील नेत्यांना थोडी तरी लाज वाटली पाहिजे की एवढे कामगार उद्ध्वस्त होत आहेत, त्यांचा शाप लागेल असेही विजय वडेट्टीवार यांनी नमूद केले.

दरम्यान मावळातील तळेगाव एमआयडीसी अकरा ऑक्टोबरला ठप्प करू. भले एमआयडीसी मधून कंपन्या स्थलांतरित झाल्या तरी आम्ही पर्वा करणार नाही असा इशारा मावळचे आमदार सुनील शेळके (mla sunil shelke) यांनी नुकताच सरकारला दिला आहे.

Edited By : Siddharth Latkar