Thane : ठाणेकरांसाठी मोठी माहिती समोर आली आहे. ठाण्यातील घोडबंदर रोडवर असलेल्या गायमुख घाट परिसरात रस्त्याचे काम हाती घेण्यात आले आहे. या पार्श्वभूमीवर ठाणे शहर वाहतूक विभागातील पोलीस आयुक्तालयाच्या कासारवडवली वाहतूक उपविभागाने वाहतूक व्यवस्थेत महत्त्वाचे बदल जाहीर केले आहेत.

शुक्रवारी ८ ऑगस्ट २०२५ रोजी रात्री १२.०१ वाजता कामाला सुरुवात होणार आहे. सोमवारी ११ ऑगस्ट २०२५ रोजी सकाळी ५ वाजेपर्यंत काम सुरु राहणार आहे, अशी माहिती समोर आली आहे. या कालावधीत काही मार्गांवर जड व अवघड वाहनांना प्रवेशबंदी असणार आहे. नागरिकांनी पर्यायी मार्गाचा वापर करण्याचे आवाहन वाहतूक पोलिसांनी केले आहे.

प्रवेशबंदी कुठे?

मुंबई, नवी मुंबई आणि ठाणे शहर या मार्गाने घोडबंदरला/ गुजरातला जाणाऱ्या जड वाहनांना कापुरबावडी जंक्शन आणि वाय जंक्शन येथे प्रवेश बंद असणार आहे. मुंब्रा किंवा कळवा या मार्गाने घोडबंदरला येणाऱ्या वाहनांना खारेगाव टोल नाक्यावर प्रवेशबंदी असणार आहे. याशिवाय नाशिकवरुन येणाऱ्या वाहनांना मानकोली नाक्यावर प्रवेश करता बंद असणार आहे.

पर्यायी मार्ग कोणते?

• वाय जंक्शन/कापुरबावडी येथून नाशिक रोड, खारेगाव टोल, मानकोली आणि अंजूरफाटा मार्गे वाहने वळवली जातील.

• मुंब्रा/कळवा मार्गावरून येणारी वाहने खारेगाव खाडी पुलाखालून मानकोलीमार्गे वळवली जातील.

• नाशिककडून येणारी वाहने मानकोली पुलाखालून अंजूरफाटा मार्गे वळवली जातील.