स्नेहिल शिवाजी, साम टीव्ही

मुंबईत पुन्हा एकदा मराठी विरुद्ध परप्रांतीय असा संघर्ष उफाळून येण्याची शक्यता आहे. निवडणूक आयोगानं मनसेची मान्यता रद्द करण्याची मागणी एकीकडे करण्यात आलीये तर दुसरीकडे उत्तर भारतीय विकास सेनेच्या या भूमिकेनंतर मनसैनिक भडकलेत. राज ठाकरेंच्या या आदेशानंतर मराठी भाषेला विरोध करणाऱ्यांविरोधात आक्रमक होत मनसेने आपल्या स्टाईलने प्रतिक्रिया दिली आहे.

राज ठाकरेंच्या विरोधात पुन्हा एकदा उत्तर भारतीय आक्रमक झाले आहेत. राज ठाकरे हे हिंदूविरोधी असल्याचा आरोप करत उत्तर भारतीयांनी थेट सर्वोच्च न्यायालयात धाव घेत मनसेची मान्यताच रद्द करण्याची मागणी केली आहे. मनसेवर बंदी घालण्यात यावी ही याचिका दाखल केल्याची बातमी आल्यानंतर मनसेचे कार्यकर्ते खवळले आहेत. त्यावर मनसेने थेट आरपारची भाषा करत परप्रांतियांना अंगावर घेतलं आहे.

विधानसभा निवडणूकीत राज ठाकरेंनी हिंदुत्त्वाची भूमिका घेत निवडणूका लढवल्या. मात्र त्यांच्या पदरी पुरतं अपयश आलं. यानंतर राज ठाकरेंनी गुढीपाडवा मेळाव्यातून मराठीची गुढी उभारण्याची भूमिका पुन्हा मराठीचा राग आळवला आणि मराठीचा आग्रह धरत आंदोलन पुकारलं. मात्र आता थेट राज ठाकरेंच्या पक्षावर बंदी घालण्याची मागणीच उत्तर भारतीयांनी केली आहे.

दरम्यान बंदीचा अधिकार हा सर्वोच्च न्यायालयाला नसून तो अधिकार केंद्र सरकारला आहे. त्यामुळे येणाऱ्या बिहार निवडणूकांच्या तोंडावर पुन्हा राज्यात परप्रांतिय विरुध्द मराठी हा संघर्ष पेटलाय. त्यामुळे सुप्रीम कोर्ट मनसेवर बंदी घालण्यासाठी केंद्राकडे बोट दाखवणार की उत्तर भारतीयांच्या याचिकेला केराची टोपली दाखवणार? याकडे सर्वांचे लक्ष लागलं आहे.