Pune : पुण्यातून एक धक्कादायक प्रकार समोर आला आहे. पुणे-अहिल्यानगर महामार्गावरील रांजणगाव येथे एसटी कर्मचाऱ्यांवर काही अज्ञात व्यक्तींनी हल्ला करण्याचा प्रयत्न केला. स्थानिक नागरिकांच्या सतर्कतेमुळे मोठा अनर्थ टळला आहे. या घटनेमुळे एसटी महामंडळातील कर्मचाऱ्यांमध्ये भीतीचे वातावरण निर्माण झाले आहे.

राज्यात एसटी महामंडळाच्या कर्मचाऱ्यांवर होणाऱ्या हल्ल्यांची मालिका काही केल्या थांबत नाही आहेत. असाच एक धक्कादायक प्रकार पुणे-अहिल्यानगर महामार्गावरच्या रांजणगाव जवळ घडला आहे. काहीजणांनी थेट लोखंडी रोड घेऊन एसटी बसच्या कंडक्टरवर हल्ला करण्याचा प्रयत्न केला. पण या हल्ल्यात कंडक्टर थोडक्यात बचावला.

स्थानिक नागरिकांच्या सतर्कतेमुळे हल्लेखोरांच्या हल्ल्यातून एसटी कंडक्टर सुखरुप वाचला. तरीही या घटनेमुळे एसटी कर्मचाऱ्यांमध्ये भीतीचे वातावरण निर्माण झाले आहे. रात्रंदिवस प्रवाशांच्या सेवेसाठी झटणाऱ्या कर्मचाऱ्यांवर असे हल्ले होणे चिंताजनक असल्याचे म्हटले जात आहे. या हल्ल्यांमुळे परिसरात खळबळ उडाली आहे.

या प्रकरणाची माहिती मिळताच पोलिसांनी तात्काळ घटनास्थळी धाव घेतली. पोलिसांनी चौकशी सुरु केली असून हल्लेखोरांचा शोध घेण्यात येत आहे. स्थानिक नागरिक आणि प्रवाशांनी या प्रकाराचा तीव्र निषेध केला आहे. एसटी कर्मचाऱ्यांच्या सुरक्षिततेसाठी कठोर उपाययोजना करण्याची मागणी करण्यात येत आहे.