Pune Crime : सासरी येण्यास नकार दिल्याने वाद, पतीने पत्नीवर केला चाकूने हल्ला; गळ्यावर वार झाल्याने महिलेचा मृत्यू

Pune : पुण्यातून धक्कादायक प्रकार समोर आला आहे. कौंटुबिक वादातून एकाने त्याच्या पत्नीच्या गळ्यावर चाकूने वार केल्याचे उघडकीस आले आहे. हल्ल्यामध्ये महिलेचा मृत्यू झाला आहे. महिलेच्या मावशीने केलेल्या तक्रारीनंतक पोलिसांनी महिलेच्या नवऱ्याला दोन तासात अटक केली आहे. खूनाच्या प्रकरणामुळे परिसरात मोठी खळबळ उडाली आहे.

मिळालेल्या माहितीनुसार, मृत महिलेचे नाव ममता (वय २१ वर्षे) आणि तिच्या पतीचे नाव प्रेम (वय २७ वर्षे) आहे. कौटुंबिक वादानंतर घरी येण्यास नकार दिल्याने प्रेमने ममतावर हल्ला केला. तिच्या गळ्यावर चाकूने वार करत उत्तमने तिची हत्या केली. ही धक्कादायक घटना पुण्यातील खांदवेनगर येथे रविवारी (२७ जुलै) दुपारी तीन-सव्वा तीनच्या सुमारास घडली आहे.

२०२० मध्ये प्रेम आणि ममता यांचा विवाह झाला होता. प्रेमला दारु पिण्याचे व्यसन होते. या व्यसनापायी तो ममताला सारखा त्रास देत असे. मागील काही महिन्यांपासून ममता तिच्या आईसोबत राहत होती. प्रेम ममताला फोन करुन घरी परत यायला सांगत असे. पण जोपर्यंत दारु सोडणार नाही तोपर्यंत मी घरी येणार नाही, असे ममता प्रेमला सांगत नकार देत असे.

ममता तिच्या आई आणि मावशीसोबत राहत होती. मावशीने पोलिसांना दिलेल्या माहितीनुसार, रविवारी (२७ जुलै) दुपारी प्रेम ममताला सासरी घेऊन जाण्यासाठी तिच्या आईच्या घरी पोहोचला. ममताच्या काकांना फोन करुन तो फोन प्रेमने तिच्या मावशीकडे दिला. फोनवर बोलण्यासाठी त्या खोलीच्या बाहेर गेल्या. त्याचदरम्यान त्यांचा लहान मुलगा घरातून जोरात ओरडत बाहेर आला. त्यावेळेस प्रेमने ममतावर चाकूने हल्ला केला होता.

खोलीत जाऊन बघितल्यानंतर प्रेमने एका हाताने ममताचे तोंड दाबले आहे आणि दुसऱ्या हाताने तो ममताचा गळा चाकूने चिरत होता. तिच्या गळ्यातून रक्ताच्या चिळकांड्या बाहेर पडत होत्या. त्याने मावशीवरही चाकूने हल्ला केला. मावशीने आरडाओरडा केल्यानंतर प्रेम पळून गेला. त्यानंतर ममता आणि तिच्या मावशीला रुग्णालयात नेण्यात आले. पण उपचारापूर्वीच ममताचा मृत्यू झाला. या प्रकरणानंतर ममताच्या मावशीने विमाननगर पोलीस ठाण्यात तक्रार दाखल केली. त्यानंतर अवघ्या दोन तासामध्ये प्रेमला अटक करण्यात आली.