युद्धाने टेन्शन वाढवलं, गणेशमूर्तींच्या पॅकेजिंगसाठी फोम मिळेना; छोटे उद्योजक हवालदील

अमेरिका-इराण युद्धाचा मोठा फटका भारतातल्या छोट्या व्यापाऱ्यांना बसलाय. कच्चा माल आणि निर्यात महागल्यामुळे छोटे उद्योजक पुरते हवालदिल झाले आहेत.

बदलापुरातील युवा उद्योजक निमेश जनवाड हे दरवर्षी आपल्या चिंतामणी क्रिएशनच्या माध्यमातून दीड ते दोन लाख गणेशमूर्ती तसंच पूजेचं साहित्य 25 हून अधिक देशांमध्ये पाठवत असतात. मात्र युद्धामुळे पॅकिंगसाठी आवश्यक असलेलं फोम उपलब्ध होत नसल्याने परदेशात गणेशमूर्ती कशा पाठवायच्या असा गंभीर प्रश्न त्यांच्यासमोर उभा राहिलाय. महत्त्वाचं म्हणजे या युद्धामुळे निर्यातही महागलीय.

शेकडो कंटेनर जेएनपीटी बंदरात अडकून पडले आहेत. ग्राहकांपर्यंत माल केव्हापर्यंत पोहोचेल, त्याची कोणतीच खात्री व्यापाऱ्यांना देता येत नाही. परदेशातील ग्राहकांनी या सर्व ऑर्डर नोव्हेंबर-डिसेंबरमध्येच बुक केल्या आहेत. त्यामुळे एकीकडे कच्च्या मालाची कमतरता, दुसरीकडे वाढलेली महागाई आणि तिसरीकडे युद्धामुळे निर्माण झालेली अनिश्चितता या तिहेरी कात्रीत निमेश जनवाड यांच्यासारखे शेकडो छोटे उद्योजक सापडले आहेत. त्यामुळे केंद्र सरकारनं यावर लवकरात लवकर तोडगा काढावा अशी मागणी जनवाड यांनी केलीय.

गॅस तुटवड्याचा कल्याणमधील हॉटेल व्यावसायिकांना फटका

आंतरराष्ट्रीय स्तरावर सुरू असलेल्या युद्धाचा परिणाम आता स्थानिक पातळीवरही दिसू लागल्याचं पाहायला मिळत आहे. अमेरिका इस्त्रायल-इराण यांच्यातील युद्धजन्य परिस्थितीचा थेट फटका कल्याण डोंबिवलीतील हॉटेल व्यावसायिकांना फटका बसल्याचे चित्र समोर येत आहे.

कल्याण शहरात सध्या कमर्शियल गॅसचा तुटवडा निर्माण झाला आहे. त्यामुळे हॉटेल व्यावसायिक मोठ्या अडचणीत सापडले आहेत. घरगुती गॅसचा पुरवठा सुरळीत असला तरी हॉटेल आणि रेस्टॉरंटसाठी लागणारा कमर्शियल गॅस वितरित होत नसल्याची तक्रार सातत्याने व्यावसायिकांकडून केली जातंय.