सागर आव्हाड, पुणे

पुण्यातल्या वाहतूक नियमांबाबत मोठी बातमी समोर आली आहे. मुंबई- बंगळुरू बाह्यवळण मार्ग परिसरातील भूमकर चौक भुयारी मार्ग ते नऱ्हे गावातील श्री कंट्रोल चौक दरम्यान जड वाहनांना बंदी घालण्यात आली आहे. पुणे पोलिस उपायुक्त अमोल झेंडे यांनी हे आदेश दिले आहेत. या भागातील गंभीर अपघातांच्या पार्श्वभूमीवर सकाळी ७ ते ११ आणि सायंकाळी ५ ते रात्री ९ या वेळेत जड वाहनांना बंदी घालण्यात येणार आहे.

बाह्यवळण मार्गावरील नऱ्हे, धायरी परिसराचा पुणे महापालिकेत समावेश झाला आहे. या भागात अनेक शैक्षणिक संस्था आहेत. तसेच खासगी कंपन्याही आहेत. विद्यार्थी वाहतूक करणारी वाहने या परिसरातून जातात. मुंबई- बंगळुरू बाह्यवळण परिसरातील अनेक इमारती आहेत. भागातील वाहतूक, वाढती लोकसंख्या, तसेच अपघातांचे प्रमाण विचारात घेऊन भूमकर चौकातील भुयारी मार्ग ते नऱ्हे गावातील श्री कंट्रोल चौकदरम्यान जड वाहनांना बंदी घालण्याचे आदेश पोलिस उपायुक्त अमोल झेंडे यांनी दिले आहेत.

सिंहगड रस्त्यावरील मॅकडोनाल्डस उपाहारगृहसमोर दोन्ही बाजूस ५० मीटर अंतरापर्यंत सर्व प्रकारची वाहने लावण्यास मनाई करण्यात आली आहे. याबाबत नागरिकांच्या काही हरकती किंवा सूचना असल्यास वाहतूक पोलिस उपायुक्त कार्यालय, येरवडा, गोल्फ क्लब रस्ता येथे लेखी स्वरूपात कळवाव्यात, असे आवाहन देखील उपायुक्तांनी दिले आहे.

दरम्यान, पुण्यातील वाहतुकीबाबत अजित पवार यांनी सांगितले की, 'लोकांनी वाहतूक शिस्त पाळले पाहिजे पाच- एक हजार रुपये दंड करण्याचा विचार, प्राथमिक चर्चा सुरू आहेत गडकरींची मानसिकता ते आहे देशाचं काम बघत आहे ते, टोल ट्राफिक गर्दी हे टाळण्यासाठी बरेचसे टोल काढलेले आहेत. उड्डाणपूल किंवा इतर काय करता येईल का याची पण चर्चा सुरू आहे.