सचिन जाधव, पुणे

पुण्यातील भोर तालुक्यात महुडे खोऱ्यात मंगळवारी लाचलुचपत प्रतिबंधक (ACB ) ने मोठी कारवाई केली आहे. शिंद आणि गवडी गावांचे ग्रामसेवक महादेव नामदेव सालगुडे यांनी घरकुल योजनेचा दुसरा हप्ता मंजूर करून देण्यासाठी १५ हजार रुपयांची लाच मागितली होती. ही लाच स्वीकारताना लाचलुचपत प्रतिबंधक विभागाच्या (ACB) पथकाने रंगेहाथ पकडले.

मिळालेल्या माहितीनुसार, तक्रारदार हे शासनाच्या घरकुल योजनेचे लाभार्थी आहेत. घरकुलाच्या दुसऱ्या हप्त्याची रक्कम मंजूर करून देण्यासाठी ग्रामसेवक सालगुडे यांनी तक्रारदाराकडे १५ हजार रुपयांची मागणी केली होती. शासकीय कामासाठी लाचेची मागणी होत असल्याने त्रस्त झालेल्या तक्रारदाराने पुणे येथील एसीबी कार्यालयात तक्रार दाखल केली.

तक्रारीची प्राथमिक पडताळणी केल्यानंतर एसीबीच्या अधिकाऱ्यांनी सापळा रचला. त्यानुसार मंगळवारी भोलावडे–शिंद मार्गावर ठरलेल्या ठिकाणी कारवाई करण्यात आली. तक्रारदाराकडून १५ हजार रुपयांची रक्कम स्वीकारताना ग्रामसेवक सालगुडे यांना अधिकाऱ्यांनी रंगेहाथ पकडले. या कारवाईनंतर परिसरात मोठी चर्चा रंगली असून अनेक नागरिकांनी एसीबीच्या कारवाईचे स्वागत केले आहे.

घरकुलासारख्या गरजू नागरिकांसाठी असलेल्या योजनेतही लाच मागितली जात असल्याने ग्रामस्थांमध्ये संताप व्यक्त होत आहे. शासनाच्या योजनांचा लाभ मिळवण्यासाठी सामान्य नागरिकांना आर्थिक अडचणींचा सामना करावा लागत असल्याच्या तक्रारी यापूर्वीही समोर आल्या आहेत. या घटनेमुळे शासकीय यंत्रणेवरील विश्वासावर प्रश्नचिन्ह उपस्थित झाले आहे. दरम्यान, या प्रकरणी भोर पोलीस ठाण्यात गुन्हा दाखल करण्याची प्रक्रिया सुरू असून पुढील तपास एसीबीकडून करण्यात येत आहे.