Shocking : भयंकर! अघोरी पूजेच्या नावाखाली जोडप्याची हत्या, मृतदेह मठ परिसरात लपवले; भोंदू बाबाच्या खुनी चेहऱ्याचं काळं सत्य समोर

भूषण अहिरे धुळे

नाशिकमधील भोंदू खरात प्रकरण ताजे असतानाच धुळ्यात आणखी एका भोंदू बाबाचा पर्दाफार्श झाल्याची मोठी बातमी समोर आली आहे. साक्री येथील निजामपूर जैताणे येथे पूजा विधीच्या नावाखाली अघोरी कृत्ये करून दोन जणांची निर्घृण हत्या केल्याची धक्कादायक घटना उघडकीस आली आहे. योगेश खैरनार असे या कथित भोंदू बाबाचे नाव आहे. याप्रकरणी भोंदू खैरनारला बेड्या ठोकण्यात आल्या असून पुढील तपास पोलीस करत आहेत.

मिळालेल्या माहितीनुसार, जयश्री काकुस्ते (वय २५) आणि अक्षय सोनवणे (वय २८) अशी मृतांची नावे असून, या दोघांना काही धार्मिक विधींच्या नावाखाली बोलावण्यात आले होते. आरोपी योगेश खैरनार याने अघोरी पूजा करण्याचे आमिष दाखवत त्यांना आपल्या जाळ्यात ओढले. त्यानंतर या दोघांची निर्घृणपणे हत्या केल्याचे प्राथमिक तपासात समोर आले आहे. या घटनेतील सर्वात धक्कादायक बाब म्हणजे, हत्या केल्यानंतर आरोपीने मृतदेह लपवण्यासाठी मठ परिसरातील एका निर्जन ठिकाणी अक्षय सोनवणे याचा मृतदेह पुरून ठेवला होता.

पोलिसांना संशय आल्याने त्यांनी परिसरात शोधमोहीम राबवली आणि दोन्ही मृतदेह ताब्यात घेतले. या प्रकरणामुळे संपूर्ण परिसर हादरला असून नागरिकांमध्ये भीती आणि संताप व्यक्त केला जात आहे. घटनेची माहिती मिळताच पोलिसांनी तातडीने कारवाई करत आरोपीला ताब्यात घेतले आहे. सध्या या प्रकरणाचा सखोल तपास सुरू असून आरोपीने आणखी कोणते गुन्हे केले आहेत का, याचाही शोध घेतला जात आहे. तसेच या प्रकरणामागे अंधश्रद्धा, आर्थिक व्यवहार किंवा इतर काही कारणे आहेत का, याचाही तपास सुरू आहे.

या धक्कादायक घटनेमुळे अंधश्रद्धेच्या नावाखाली घडणाऱ्या गुन्ह्यांबाबत पुन्हा एकदा चिंता व्यक्त होत आहे. नागरिकांनी अशा भोंदू बाबांपासून सावध राहावे आणि कोणत्याही प्रकारच्या संशयास्पद कृत्यांची माहिती तात्काळ पोलिसांना द्यावी, असे आवाहन प्रशासनाकडून करण्यात आले आहे.