आखाती देशांमध्ये महिनाभर युद्ध सुरु आहे. अमेरिका, इराण आणि इस्त्राईल या देशांच्या युद्धामुळे भारताला फटका बसला आहे. स्वयंपाक घरापासून ते अगदी वाहनांपर्यंत मोठा परिणाम दिसून येत आहे. गॅसच्या टंचाईमुळे नागरिकांनी एजन्सीबाहेर लांबलचक रांगा लावलेल्या पाहायला मिळाल्या अशातच आता पेट्रोल संपण्याच्या अफवेने आणि भीतीने वाहनधारकांनी राज्यातील अनेक ठिकाणी पेट्रोल पंपावर देखील गर्दी केलेली पाहायला मिळतेय.

कल्याणमध्ये पेट्रोल पंपावर तोबा गर्दी

राज्यभरात पेट्रोल बंद होण्याच्या अफेने एकच धुमाकूळ घातल्यामुळे नागरिकांमध्ये भीतीचा वातावरण आहे. कल्याणमध्ये देखील नागरिकांनी आपली वाहन घेऊन सकाळपासूनच कल्याण डोंबिवली मधील प्रत्येक पेट्रोल पंपावर गर्दी केल्याचा पाहायला मिळालं होतं. या गर्दीमुळे संध्याकाळपर्यंत पेट्रोल पंपावरील पेट्रोलचा साठा संपला आणि पंप बंद करण्यात आला. दरम्यान पुन्हा तो चालू करण्यात येईल असं पंप चालकांनी म्हटले.

नाशिकमध्ये पेट्रोल पंप बंद?

नाशिकच्या मनमाड शहरा पासून काही अंतरावर असलेल्या पानेवाडी टर्मिनल येथून रोज आय ओ सी,भारत पेट्रोलियम,हिंदुस्थान पेट्रोलियम कंपनी मधून सुरळीतपणे पेट्रोल,डिझेलचा पुरवठा सुरू असताना, अचानक पसरलेल्या अफवेमुळे मनमाड शहरातील पेट्रोल पंपावर रात्री पेट्रोल भरण्यासाठी वाहन धारकांनी रांगा लावल्या आणि बघता बघता तोबा गर्दी झाली.

पालघरमध्ये पेट्रोलचा तुटवडा?

पालघर, बोईसर , मासवण,चारोटी ,विक्रमगड परिसरात देखील पेट्रोल पंपावर पेट्रोल डिझेल भरण्यासाठी वाहनचालकांनी गर्दी केल्याचे दिसून आले. जिल्ह्यात पेट्रोल डिझेलचा तुटवडा नसून पेट्रोल डिझेलचा पुरवठा सुरळीत सुरू असल्याच्या सूचना जिल्हा प्रशासनाकडून देण्यात आल्या नंतर ही पेट्रोल डिझेल संपेल आणि महाग होईल, या भीतीपोटी नागरिकांनी पेट्रोल पंपावर एकच गर्दी केल्याचे पहायला मिळाले.

नांदेडमध्ये पेट्रोल पंपावर नागरिकांच्या रांगा

नांदेडमध्ये रात्रीपासुन पेट्रोल पंपावर गर्दी झाली.पेट्रोल मिळणार नाहीं अशा अफवामुळे पंपावर रांगा लागल्या. शहरासह ग्रामीण भागात देखील अशीच परिस्थिती निर्माण झाली आहे.मोठया टाक्या , कॅन घेउन नागरिक रांगा लावत आहेत.