panhala fort : दिवाळीची तयारी सगळीकडेच जोमाने सुरू आहे. फराळ, कंदील, रांगोळी या सोबत दिवाळी किल्ल्यांची सुद्धा तयारी मुंबई आणि नवी मुंबईत पहायला मिळत आहे. पनवेलच्या पिल्लई कॉलेजमध्ये असंच काही चित्र पाहायला मिळत आहे.

या दिवाळी किल्ल्यात ३ विशेष आकर्षण आहेत. पन्हाळगड, सिद्धी जोहरची छावणी आणि घोडखिंडीतल्या युद्धाचा देखावा आहे. या दिवाळी किल्ल्यात पन्हाळगडावरील अंबरखाना, अंधारबाव, दुतोंडी बुरुज, काली बुरुज, तीन दरवाजा, सोमेश्वर तलाव, तटबंदी व इतर वास्तू पाहायला मिळते.

छत्रपती शिवराय आणि पन्हाळगडाशी संबंधित ऐतिहासिक घटना म्हणजे सिद्धी जोहरचा वेढा. त्या घटनेचा अनुभव या दिवाळी किल्ल्यातही पहायला मिळतो. गोणपाटाच्या रुमालांना तंबूचा आकार देऊन आणि चुना रंगवून, विद्यार्थ्यांनी सिद्धी जोहरची छावणी पन्हाळ्याभोवती रचली आहे.

या दिवाळी किल्ल्याच्या दुसऱ्याच बाजूला घोडखिंड साकारून त्यात दांडपट्टा चालवणारे बाजीप्रभू देशपांडे आणि रक्तरंजित झालेल्या मराठे मावळे आणि सिद्धी जोहरच्या आदिलशाही फौजेचा देखावा पाहायला मिळतो. या देखाव्यात गोफण, फेकीचे दगड, दोरखंड अश्या इतर युद्धकलेतील गोष्टी आपले लक्ष वेधून घेतात.

विद्यार्थी काय म्हणाले?

जमवलेले रंग, गोणपाट, जुन्या असाइन्मेंटचे गट्ठे, पुट्ठे व इतर टाकाऊ गोष्टींपासून हा दिवाळी किल्ला साकारताना विद्यार्थ्यांना खूप मजा आली. मराठी वाङ्मय मंडळाच्या विद्यार्थ्यांनी या दिवाळी किल्ल्यात फक्त जीव नाही फुंकलाय, तर त्यातून पराक्रमाची गोष्टही मांडली आहे. छत्रपती शिवाजी महाराजांचा इतिहासाची उजळणी आणि मराठी संस्कृती साजरा करणे हा यामागील उद्देश, असं या मंडळाचे विद्यार्थी सांगतात.