- सिद्धेश म्हात्रे

राज्यभरात आजपासून पाेलिस भरतीस प्रारंभ झाला आहे. राज्यातील बहुतांश भागात पाऊस पडत असून काही ठिकाणी पाेलिस भरतीच्या मैदानी चाचणी घेण्यासाठी अडचणी येऊ लागल्या आहेत. नवी मुंबईत पावसामुळे मैदानी चाचणी घेण्यातील अडचणी लक्षात घेता पोलिस आयुक्त संजय पाटील यांनी नवी मुंबई पोलिस भरती प्रक्रियाचे वेळापत्रकात बदल केला आहे.

नवी मुंबई पोलिस आयुक्तालयामध्ये 185 पोलिस शिपाई रिक्त पदांची प्रवर्ग निहाय भरती प्रक्रिया आजपासून सुरु होणार होती. दरम्यान नवी मुंबई परिसरात मंगळवार पासून पाऊस पडत आहे. या पावसामुळे मैदानी चाचणी घेण्यायोग्य नसल्याचे मत अधिकारी वर्गाचे झाले.

आज (ता.19) भरती प्रक्रियेसाठी आलेल्या आणि उद्या (ता. 20) येणाऱ्या उमेदवारांची चाचणी येत्या 23 जून रोजी होणार आहे. तसेच 21 जून आणि 22 जून रोजी जे उमेदवार येणार होते त्यांची मैदानी चाचणी आता 27 जून रोजी घेतली जाणार आहे अशी माहिती नवी मुंबई पोलिस आयुक्त संजय पाटील यांनी दिली.

Edited By : Siddharth Latkar