नाना पटोलेंनी एकनाथ शिंदेंना दिलेल्या ऑफरवरुन राजकीय वातावरण तापलंय. पटोलेंच्या वक्तव्यामुळे आपली वाचाच गेल्याचा खोचक टोला संजय राऊतांनी लगावलाय. शिंदे आणि अजितदादांना आलटून पालटून सीएम करू, अशी ऑफर नाना पटोले यांनी दिली. 'मी काय बोलणार, माझी तर वाचाच गेली, अशी प्रतिक्रिया संजय राऊत यांनी दिली.

हे असं असलं तरी राऊतांनी मात्र पटोलेंच्या विधानाचा थेट विरोध न करता शिंदेंना दिलेली ऑफर स्वीकारल्यास विचार करु, असं म्हणत सूचक संकेत दिलेत. तर नाना पटोलेंनी घाई केली, असं विधान वडेट्टीवारांनी केलंय. नाना पटोलेंनी लवकर भांडं वाजवलं, अशी प्रतिक्रिया संजय राऊत यांनी दिली आहे. राजकारणात कुणी कायमचा दोस्त किंवा दुश्मन नसतो, असे काँग्रेस आमदार विजय वडेट्टीवार म्हणाले.

महाविकास आघाडीकडून एकत्र येण्याचे संकेत मिळाले असले तरी सत्तेचं समीकरण यशस्वी होऊ शकतं का? पाहूयात....

महाविकास आघाडी भाजपला धक्का देणार?

महाविकास आघाडीकडे 50 आमदारांचं संख्याबळ

अजित पवारांसोबत 41 आमदारांचं संख्याबळ

एकनाथ शिंदेंकडे 57 आमदारांचं संख्याबळ

शिंदे गट आणि अजित पवार गट मविआसोबत गेल्यास बहुमत शक्य

महायुतीत शिंदे गटाच्या मंत्र्यांच्या खात्यांमध्ये वाढत चाललेला हस्तक्षेप, निधी वाटप याबरोबरच शह काटशहाच्या राजकारणामुळे शिंदे गट अस्वस्थ आहे.. त्यातच आता महाविकास आघाडीकडूनही एकत्र येण्याचे सूचक संकेत देण्यात आले आहेत. विधीमंडळात आमने-सामने आल्यानंतरही एकमेकांशी नजरानजरही न करणारे उद्धव ठाकरे एकनाथ शिंदेंना स्वीकारणार का? याकडे लक्ष लागलंय. तसंच गेल्या 5 वर्षात भिन्न विचारधारांचे पक्ष एकत्र आलेत.. त्यामुळे विचारधारांना तिलांजली देऊन पटोलेंच्या दाव्यानुसार पुन्हा टोकाच्या विचारधारा असलेले पक्ष सत्तेसाठी एकत्र आले तर आश्चर्य वाटायला नको....