अमोल कलये, साम टीव्ही, प्रतिनिधी

Accident News : मुंबई-गोवा महामार्गावर भीषण अपघात झाल्याची माहिती समोर आली आहे. महामार्गावर संगमेश्वरमधील ओझरखोल येथे एसटी बस आणि मिनी ट्रॅव्हलर बस यांच्यामध्ये अपघात झाला आहे. दोन्ही बसेस एकमेकांच्या समोरुन येत होत्या. समोरासमोर धडक होऊन हा अपघात झाल्याचे म्हटले जात आहे.

रत्नागिरीतील संगमेश्वरच्या ओझरखोल येथे एसटी बस आणि मिनी बस यांची समोरासमोर धडक होऊन भीषण अपघात झाला. एसटी बस ही रत्नागिरीवरुन चिपळूणच्या दिशेने जात होती. तर मिनी बस ही रत्नागिरीच्या दिशेने पुढे येत होती. त्यादरम्यान हा अपघात झाला. अपघातातील जखमींना रुग्णालयात नेण्यात आले आहे.

एसटी बस आणि मिनी बसच्या धडकेमध्ये दोन्ही वाहनांमधील काही प्रवासी जखमी झाल्याची माहिती समोर आली आहे. सर्व जखमींना संगमेश्वर ग्रामीण रुग्णालयात दाखल करण्यात आले आहे. मिनी बसचा चालक गंभीररित्या जखमी झाला आहे. जखमी चालकाला प्राथमिक उपचारांनंतर रत्नागिरीला हलवण्यात आले आहे.

मुंबई-गोवा महामार्गावर एसटी बस आणि मिनी बस यांची धडक इतक्या जोरात झाली, ही दोन्ही वाहनांच्या पुढच्या भागाचा चेंदामेंदा झाला. यात मिनी बसचा चालक हा बसच्या कॅबिनमध्ये अडकला गेला. त्याला कॅबिनमधून बाहेर काढण्यासाठी शर्थीचे प्रयत्न करण्यात आली. अर्धा तासानंतर चालकाला बाहेर काढण्यात आले.