Jitrendra Awhad : विधानसभेत गुंडांना प्रवेश देणार असाल तर... विधान भवनातील हाणामारीवर जितेंद्र आव्हाडांच्या संतापाचा कडेलोट

Jitrendra Awhad Statement : विधान भवनाच्या लॉबीत हाणामारी झाल्याची घटना समोर आली आहे. पावसाळी अधिवेशनादरम्यान जितेंद्र आव्हाड आणि गोपीचंद पडळकर यांचे कार्यकर्ते एकमेकांना भिडले. जितेंद्र आव्हाड आणि गोपीचंद पडळकर यांच्यातील वाद टोकाला गेल्याचे पाहायला मिळाले आहे. याबाबत गोपीचंद पडळकर यांनी उत्तर देणे टाळले आहे. आम्ही गेटवर होतो, काय घडलं माहीत नाही असे पडळकर यांनी म्हटले आहे.

गोपीचंद पडळकरांनी या हाणामारीवर बोलणे टाळले असले तरी यावर जितेंद्र आव्हाडांनी प्रतिक्रिया दिली आहे. प्रसारमाध्यमांच्या प्रतिनिधींनी हाणामारीबाबत प्रश्न विचारला असता, हल्ला कोणी केला? असा प्रतिप्रश्न आव्हाडांनी केला. हा हल्ला पडळकरांच्या कार्यकर्त्यांनी केला, असे जितेंद्र आव्हाडांनी सांगितले.

'अख्ख्या महाराष्ट्राला समजलं की कोणी हल्ला केला...आम्हाला याच्यापेक्षा काही जास्त पुरावेच द्यायचे नाहीत. जर तुम्ही विधानसभेत गुंडांना प्रवेश देणार असाल आणि ते हल्ले करत असतील तर आम्हीच सुरक्षित नाहीत. मी स्वतः याबाबत ट्विट टाकलं आहे. शिवीगाळ करतो, तुला मारून टाकू, कुत्रा, डुक्कर...असं बोललं जातंय, काय चाललंय काय विधानसभेत' असे आव्हाड म्हणाले.

'मी भाषण करून बाहेर आलो...मोकळ्या हवेवर आलो होतो. हे मलाच मारण्यासाठी सगळे आले होते. विधानसभेत विधीमंडळाच्या पायऱ्यांवर आणि विधानभवनात आमदार सुरक्षित नसतील तर कशाला राहायचं आमदार? काय गुन्हा आहे आमचा? कोणीतरी मवाल्यासारखा येतो आणि आम्हाला शिव्या देतो. त्याला ऑफिशियल लँग्वेज म्हणून घोषित करा ना. असंसदीय शब्द वापरले जातात. सत्तेची एवढी मुजोरी. एवढा माज आहे का सत्तेचा?' असा संताप जितेंद्र आव्हाड यांनी व्यक्त केला.