मुंबई महानगरपालिकेने मोठा निर्णय घेतला आहे. रुग्णालयांमध्ये स्वच्छता राखण्यासाठी आता गुटखा, तंबाखू आणि पान खाऊन येणाऱ्या रुग्णांसह त्यांच्या नातेवाईकांवर कठोर निर्बंध घालण्यात येणार आहेत सार्वजनिक ठिकाणी थुंकून अस्वच्छता निर्माण करणाऱ्यांमुळे रुग्णालयांचे परिसर तसेच महापालिकेची कार्यालये घाण होत असल्याने प्रशासनाने याची गंभीर दखल घेतली आहे.

महापालिकेतील सभागृह नेते गणेश खणकर यांनी यासंदर्भात महापालिका सभागृहात ठरावाची सूचना मांडली होती. त्यामध्ये गुटखा, तंबाखू आणि पान खाऊन येणाऱ्या नागरिकांना महापालिका मुख्यालय, विभागीय कार्यालये, रुग्णालये आणि दवाखान्यांमध्ये प्रवेशबंदी करण्याची मागणी करण्यात आली होती. प्रशासनाने या सूचनेचा विचार करत नियमावली तयार करण्याची प्रक्रिया सुरू केली आहे.

नवीन नियमांनुसार, रुग्णालयांच्या प्रवेशद्वारांवर तैनात असलेले सुरक्षा रक्षक येणाऱ्या रुग्णांसह त्यांच्या नातेवाईकांची तपासणी करतील. गुटखा किंवा तंबाखू सेवन खाल्ल्याचे आढळल्यास संबंधित व्यक्तींना प्रवेश नाकारला जाऊ शकतो. तसेच त्यांच्या जवळ गुटखा किंवा तंबाखू आढळल्यास तो जप्त करण्याचीही तरतूद करण्यात येणार आहे.

महापालिकेच्या आरोग्य विभागामार्फत तयार होणाऱ्या नियमावलीमध्ये प्रवेशबंदी, दंडात्मक कारवाई तसेच थुंकून घाण केलेले ठिकाण संबंधितांकडून स्वच्छ करून घेण्यासारख्या उपाययोजनांचाही समावेश असणार आहे. स्वच्छता, सार्वजनिक आरोग्य आणि शिस्त राखण्याच्या उद्देशाने ही मोहीम राबवण्यात येणार असून लवकरच तिची अंमलबजावणी सुरू होण्याची शक्यता आहे.