ठाणे : आज विधानसभा निवडणुकीच्या प्रचाराचा शेवटचा दिवस आहे. निवडणूक प्रचाराचा शेवटचा दिवस असल्याने राजकीय पक्षांनी कंबर कसली आहे. प्रचाराचा शेवटचा दिवस असल्याने अनेक राजकीय पक्षांच्या कार्यकर्त्यांनी बाईक रॅलीवर भर दिला आहे.

मुख्यमंत्री एकनाथ शिंदे यांचा बालेकिल्ला समजल्या जाणाऱ्या कोपरी पाचपाखाडीतही राजकीय घडामोडींना वेग आला आहे. या कोपरी पाचपाखाडीत शिवसेनेच्या दोन्ही गटाचे कार्यकर्ते आमनेसामने आले. यावेळी दोन्ही गटाच्या कार्यकर्त्यांनी एकमेकांविरोधात जोरदार घोषणाबाजी केली. यानंतर परिसरात काही वेळ तणावाचं वातावरण निर्माण झालं.

आज सोमवारी प्रचाराची सांगता असल्याने ठाण्यातील कोपर पाचपाखाडी मतदारसंघातील युतीचे उमेदवार एकनाथ शिंदे आणि महाविकास आघाडीचे उमेदवार केदार दिघे यांचे कार्यकर्ते अष्टविनायक चौक या ठिकाणी एकमेकांच्या समोर आले. त्यावेळी दोन्ही गटाच्या कार्यकर्त्यांनी एकमेकांच्या विरोधात घोषणाबाजी केल्याचं पाहायला मिळालं.

ठाण्यातील उमेदवारांचा प्रचार शिगेला पोहोचला आहे.आज प्रचाराचाला काही तास शिल्लक राहिले असताना कोपरी पाचपाखाडीत शिवसेनेच्या दोन्ही गटाकडून मोटार सायकल रॅली काढण्यात आली.

ठाण्याच्या कोपरी परिसरातील अष्टविनायक चौक या ठिकाणी ही रॅली काढली. या वेळेस शिंदे गट आणि ठाकरे गटाचे कार्यकर्ते एकमेकांच्या समोर आले. त्यांनी एकमेकांच्या विरोधात घोषणाबाजी केल्याने परिसरातील राजकीय वातावरण तापलं. परंतु या ठिकाणी पोलीस असल्याने पुढील काही वेळात मोठा अनर्थ टळला.

दरम्यान, आज सकाळपासून सुरु झालेल्या प्रचार रॅलीची सांगता पाच वाजता होणार आहे. आज मतदारसंघात सर्वच राजकीय पक्षांनी आज मोटार सायकल रॅली काढण्यावर भर दिला आहे. दुपारच्या सुमारास ठाण्यातील कोपरी येथील अष्टविनायक ठिकाणी झालेल्या घटनेनंतर पोलिसांना सतर्क राहण्याच्या सूचना देण्यात आल्याची माहिती मिळत आहे. या पार्श्वभूमीवर पोलीस कर्मचारीही सतर्क झाले आहेत.