Thane News : मध्यान्ह भोजनाच्या खिचडीत पाल, ठाणे महानगरपालिका शाळेतील धक्कादायक प्रकार

ठाणे : शाळेतील मुलांना मध्यान्ह भोजन देण्याची योजना सरकारने सुरु केली आहे. त्यानुसार प्रत्येक शाळेत मुलांना दुपारच्या वेळी मध्यान्ह पोषण आहारात खिचडी दिली जात असते. मात्र बऱ्याचदा हा आहार निकृष्ट दर्जाचा असल्याचे समोर आले आहे. असाच प्रकार ठाणे महापालिकेच्या शाळेत पाहण्यास मिळाला असून मनपाच्या शाळा क्रमांक ८८ मध्ये खिचडीत चक्क पाल आढळून आल्याचा धक्कादायक प्रकार समोर आला आहे. 

ठाणे (thane) महानगरपालिकेकडून महापालिकेच्या शाळेला सकस आहार म्हणून खिचडी देण्यात येते. परंतु गेल्या अनेक वर्षापासून अनेक शाळेमध्ये खिचडीतून मुलांना विषबाधा होत असल्याचे समोर आले आहे. खिचडीची कोणतीही क्वालिटी तपासली जात नाही. या मुलांना ही खिचडी देण्यात येते, या खिचडीतून आगासन गावात ठाणे महानगरपालिका (School) शाळा क्रमांक ८८ येथे दुपारी मुलांना देण्यात आलेल्या खिचडीत पाल असल्याचे आढळून आले. खिचडी खाल्ल्याने वर्गात असलेल्या ४० मुलांना याचा त्रास जाणवू लागला आहे. 

दरम्यान याची तात्काळ सूचना महापालिकेच्या अधिकाऱ्यांना देण्यात आली. महापालिकेकडून डॉक्टरांची टीम शाळेत रवाना झाली असून अनेक मुलांना उलटीचा त्रास जाणवत आहे. अशा या खिचडी देणाऱ्या ठेकेदारावर महापालिकेने तात्काळ कारवाई करावी; लहान मुलांच्या जीवाशी खेळ करणाऱ्यांना सक्त अशी शिक्षा झाली पाहिजे; अशी मागणी होत आहे. गेल्या दोन महिन्यात दिवा विभागात अनेक घटना घडल्या आहेत. साबेगावात अशीच घटना घडली होती. बी. आर. नगर मध्ये पण अशाच प्रकारच्या घटना या वारंवार विभागात घडत आहेत.