Lightning Strike : वीज कोसळून तरुणाचा मृत्यू; केळी लागवड करण्यासाठी गेले असताना घडली घटना

अडावद (जळगाव) : जळगाव जिल्ह्यात परतीच्या पावसाने थैमान घातले होते. या कालावधीत वीज पडल्याच्या घटना घडल्या आहेत. याच दरम्यान चोपडा तालुक्यातील लोणी येथील शेतकरी केळीचे खोड लावत असताना अचानक वीज पडून तरुणाचा मृत्यू झाला. गरीब कुटुंबातील कर्ता गेल्याने गावात हळहळ व्यक्त होत असून शासनाने तत्काळ आर्थिक मदत मिळावी अशी मागणी होत आहे.

चोपडा (Chopda) तालुक्यातील लोणी येथील शिवाजी चैत्राम कोळी (वय ३५) असे मृत तरुणाचे नाव आहे. घरची परिस्थिती अत्यंत हलाखीची असल्याने मजुरी करून तो कुटुंबाचा चरितार्थ चालवीत होता. दरम्यान १५ ऑक्टोम्बरला खर्डी शिवारात मंगल पाटील यांच्या शेतात केळीचे खोड लावण्याच्या कामासाठी गेला होता. याच दरम्यान दुपारी दोनच्या सुमारास अचानक वादळी वाऱ्यासह पावसाला सुरुवात झाली व वीज (Lightning Strike) कोसळली. 

वीज शिवाजी कोळी याच्या डोक्यावरच पडल्याने त्याचा जागीच मृत्यू झाला. दरम्यान सोबत असलेल्या मजुरांनी त्याला तत्काळ अडावद प्राथमिक आरोग्य केंद्रात नेले. त्यानंतर चोपडा उपजिल्हा रुग्णालयात हलविले असता तेथे डॉक्टरांनी तपासणी करून मृत घोषित केले. शिवाजी कोळी यांच्या मागे आई, वडील, मुलगा, मुलगी, दोन भाऊ, बहीण असा परिवार आहे. कुटुंबाची सर्व जबाबदारी शिवाजी कोळीवर होती. शासनाने कोळी कुटुंबीयांना त्वरित आर्थिक मदत द्यावी, अशी मागणी होत आहे.