मुंबईतील एसटी बँकेच्या संचालक मंडळाच्या बैठकीत बुधवारी मोठी राडा झाला. सदावर्ते आणि एकनाथ शिंदे यांच्या शिवसेनेच्या कार्यकर्त्यांमध्ये तुफान हाणामारी झाली. या घटनेची माहिती मिळताच पोलिसांनी धाव घेत परिस्थिती नियंत्रणात आणली. या हाणामारीचा व्हिडिओ सोशल मीडियावर व्हायरल झाला आहे.

एसटी बँकेच्या संचालक मंडळात अडसूळ यांचा शिंदे गट आणि सदावर्ते गट यांच्यात आधीपासून वाद आहेत. याआधीही सदावर्ते यांच्यावर गैरव्यवहाराचे आरोप आधीच झाले आहेत. मात्र, बँकेच्या बैठकीत अपमानास्पद भाषा बोलल्याने राडा झाल्याची प्राथमिक माहिती हाती आली आहे.

एसटी बँक या आधी माजी खासदार आनंदराव अडसूळ यांच्या ताब्यात होती. त्यानंतर गुणरत्न सदावर्ते निवडणुकीत उतरले. या निवडणुकीत सदावर्ते गटाचे उमेदवार विजयी झाले. निवडून आल्यानंतर इतर सदस्यांनी सदावर्तेंवर संशय व्यक्त केला. गेल्या दोन वर्षात दोन्ही गटांमध्ये बाचाबाची झाल्याचे प्रकार घडले आहेत.

आजच्या संचालक मंडळाच्या बैठकीत हाणामारी झाली. या हाणामारीनंतर शिंदे गटाचे कार्यकर्ते पोलीस ठाण्यात पोहोचले. या प्रकरणी पोलिसांत गुन्हा दाखल करण्याची प्रक्रिया सुरु असल्याची माहिती मिळत आहे. आता नेमका बँकेच्या संचालक मंडळात कुठल्या मुद्यावरून राडा झाला, यावरून आरोप-प्रत्यारोप सुरु झाले आहेत.

नेमकं काय घडलं?

मुंबई एसटी बँकेच्या संचालक मंडळाची बैठक आयोजित करण्यात आली होती. या बैठकीला सदावर्ते आणि शिंदे गटाच्या पॅनलनचे सर्व संचालक उपस्थित होते. या बैठकीत दोन्ही गटांनी एकमेकांवर आरोप केले. यावेळी सदावर्ते यांच्या पॅनलच्या व्यक्तीकडून महिला कर्मचाऱ्याशी अश्लील वर्तन केल्याचा आरोप करण्यात आला. त्यानंतर त्यांनी अडसूळ यांच्या संचालकांच्या दिशेला बॉटल फेकून मारली. त्यानंतर या बैठकीत मोठा राडा झाला. या हाणामारीनंतर दोन्ही गट पोलीस ठाण्यात पोहोचले.