Maharashtra Politics : एकनाथ शिंदे यांचा मास्टरस्ट्रोक; बड्या नेत्यासह ६ माजी नगरसेवकांचा शिवसेनेत प्रवेश

एकनाथ शिंदे यांच्या शिवसेनेने स्थानिक स्वराज्य संस्थाच्या निवडणुकासाठी जोरदार तयारी केली आहे. शिंदे गटाच्या नेत्यांनी नगरपरिषद आणि जिल्हा परिषदासाठी नेत्यांच्या गाठीभेटी आणि बैठकांचा सपाटा लावला आहे. एकीकडे ठाकरे बंधू एकत्र चर्चा करत असताना एकनाथ शिंदे यांनी गेमचेंजर खेळी खेळली आहे. एकनाथ शिंदे यांनी पालघरमधील बड्या नेत्यांना गळाला लावलं आहे.

शिंदे गटाने पालघरच्या डहाणू विधानसभेत मोठा डाव टाकत नगरपरिषद हद्दीतील बड्या नेत्यांना आपल्या गळाला लावलं आहे. डहाणू नगरपरिषद हद्दीतील बड्या नेत्यांपैकी एक असलेल्या डहाणू नगरपरिषदेच्या माजी उपनगराध्यक्ष राजू माच्छी यांच्यासह अनेक माजी नगरसेवकांनी उपमुख्यमंत्री एकनाथ शिंदे यांच्या उपस्थितीत शिवसेना शिंदे गटात जाहीर प्रवेश केला.

राजू माच्छी यांच्यासह डहाणू नगरपरिषदमधील सहा माजी नगरसेवकांसह शेकडो कार्यकर्त्यांनी उपमुख्यमंत्री एकनाथ शिंदे यांच्या प्रमुख उपस्थितीत जाहीर पक्ष प्रवेश केला. येत्या नगरपरिषद निवडणुकीच्या तोंडावर शिवसेना शिंदे गटाने मित्र पक्ष असलेल्या भाजपसह राष्ट्रवादी, ठाकरे गट आणि राष्ट्रवादी शरद पवार गटाला मोठा धक्का दिला आहे.

राजू माच्छी आणि त्यांच्यासोबत पक्षातील पदाधिकाऱ्यांमुळे डहाणू नगरपरिषदेत शिवसेना शिंदे गट स्वबळाची तयारी करत असल्याच्या जोरदार चर्चा सध्या सुरू झाल्या आहेत.

शिरूरमध्ये शरद पवारांना मोठा धक्का

पुण्यात शरद पवारांना मोठा धक्का बसला आहे. पुणे जिल्हा परिषदेचे माजी सदस्य शेखर पाचुंदकर यांच्यासह रांजणगाव देवस्थान ट्रस्टच्या अध्यक्षा आणि माजी जिल्हा परिषद सदस्या स्वाती पाचुंदकर यांनी भाजपमध्ये पक्षप्रवेश केलाय. प्रदेशाध्यक्ष रवींद्र चव्हाण यांच्या उपस्थितीत हा पक्षप्रवेश सोहळा झाला. यावेळी शेखर पाचुंदकर यांनी नाव न घेता दिलीप वळसे पाटील यांच्यावर निशाणा साधला.