Shocking : कापडाच्या कारखान्यात आग, १६ जणांचा होरपळून मृत्यू, कुठे घडली घटना?

बांगलादेशच्या राजधानी ढाकामधून मोठं वृत्त हाती आलं आहे. मीरपूर येथील रुपनगरमध्ये कापडाच्या कारखान्यात भीषण आग लागल्याची घटना घडली. या दुर्घटनेत एकूण १६ जणांचा मृत्यू झाल्याची माहिती मिळत आहे. तर अनेक जण घटनेत गंभीर जखमी झाले आहेत. या घटनेची माहिती मिळताच अग्निशमन दलाच्या पथकाने घटनास्थळी धाव घेतली.

कपडा कारखान्याला आग लागल्याची माहिती मिळताच अग्निशमन दलाचे जवान घटनास्थळी पोहोचले. या घटनेत कारखान्याच्या दुसरी आणि तिसऱ्या मजल्यावर एकूण १६ मृतदेह आढळले. या दुर्घटनेतील मृतांचा आकडा वाढण्याची शक्यता आहे. आग लागण्याचं कारण अद्याप स्पष्ट झालेलं नाही.

अग्निशमन विभागाच्या वरिष्ठ अधिकाऱ्यांनी प्रत्यक्षदर्शीच्या माहितीच्या आधारे महत्वाची माहिती दिली. त्यांनी म्हटलं की, ढाकाच्या मीरपूर भागातील ७ मजली कारखान्याच्या तिसऱ्या मजल्यावर दुपारच्या सुमारास आग लागली. काही क्षणात ही आग वाऱ्यासारखी पसरली. ही आग केमिकलच्या खोलीपर्यंत पोहोचली. या खोलीत ब्लिचिंग पाऊडर, प्लास्टिक सामग्री आणि हायड्रोजन पेरोक्साइड ठेवलं होतं.

बांगलादेशाच्या अंतरिम सरकारच्या प्रमुख मुहम्मद यूनुस यांनी शोक व्यक्त केला. त्यांनी संबंधित अधिकाऱ्यांना आगीमागचं कारण शोधण्याचे आदेश दिले आहेत. तसेच त्यांनी दुर्घटनेतील जखमींना तातडीने मदत करण्याचेही आदेश जारी केले आहेत.

अग्निशमन दलाच्या अधिकाऱ्यांनी सांगितलं की, कारखान्यात होरपळून मृत्यू झालेल्या व्यक्तींची ओळख पटलेली नाही. कारखान्यात स्फोट झाल्यानंतर सर्वत्र विषारी गॅस पसरला. त्यामुळे कारखान्यातील १६ जणांचा मृत्यू झाल्याची प्राथमिक माहिती समोर आली आहे. यातील अनेक कामगारांचा जागीच मृत्यू झाला आहे. तर जखमींना तातडीने ढाकाच्या नॅशनल इन्स्टिट्यूट ऑफ बर्न अँड प्लास्टिक सर्जरी विभागात दाखल केलं आहे.