El Niño impact on India monsoon 2026, Maharashtra rainfall : एल निनो प्रशांत महासागरात सक्रिय झाला असून, त्याचा परिणाम मान्सूनवर होण्याची शक्यता हवामान विभागाकडून वर्तवण्यात आली आहे. एल निनोचा मान्सूनवर होणाऱ्या प्रभावामुळे यंदा सरासरीपेक्षा ९० टक्के इतकाच पाऊस पडेल, असा अंदाज याआधी वर्तवण्यात आला आहे. जून ते सप्टेंबर या मान्सूनच्या काळात एल निनोचा मान्सूनवर परिणाम होण्याची शक्यता आहे. एल निनो सध्या सक्रिय झाला असून त्याची तीव्रता मोठ्या प्रमाणात वाढू शकते, असा अंदाज पुणे वेधशाळेचे हवामान शास्त्रज्ञ एस. डी. सानप यांनी व्यक्त केला.

यंदा मान्सूनचा पाऊस कमी प्रमाणात होणार आहे. मान्सूनचा प्रवास रखडला आहे. तो तळकोकणात आणि दक्षिण-मध्य महाराष्ट्रातील २ ते ४ जिल्ह्यांतच पोहोचला आहे. येणाऱ्या काही दिवसांत पावसाचे जास्त संकेत नाहीत. मान्सून महाराष्ट्रात पुढे सरकण्यासाठी वातावरण पोषक नाही. सध्या पडत असलेला पाऊस अवकाळी अथवा पूर्वमोसमी पाऊस आहे. या पावसाच्या आधारावर शेतकऱ्यांनी पेरण्या करू नयेत. कृषी खात्याकडून देण्यात आलेल्या पेरण्याबाबतच्या सूचनांचे शेतकऱ्यांनी पालन करावे, असे सानप म्हणाले.

भारतात सरासरीपेक्षा ९० टक्के पाऊस पडण्याची शक्यता आहे. मराठवाडा, पश्चिम महाराष्ट्र, विदर्भात सरासरीपेक्षा कमीच पाऊस पडण्याची शक्यता आहे. त्यामुळे शेतीचे नियोजन पावसानुसारच करावे.पुण्यात पुढील ५ दिवसांत मान्सून पोहोचण्याची शक्यता आहे. पण काही ठिकाणी मान्सूनपूर्व पाऊस पडण्याची शक्यता आहे. पुण्यात मान्सून कधी येतो, त्याची आपल्याला वाट पाहावी लागेल. सध्या मान्सूनसाठी पोषक वातावरण नाही, मान्सून महाराष्ट्रात पुढे सरकण्यासाठी आपल्याला वाट बघावी लागेल, असेही सानप यांनी सांगितले.

यावर्षीचा मान्सूनदरम्यान होणारा पाऊस कमी पडेल. पुढील काही दिवस पावसाची शक्यता नाही. मान्सूनला पुढे सरकण्यासाठी परिस्थिती अनुकूल नाही. पूर्वमोसमी पावसावर अवलंबून राहून शेतकऱ्यांनी पेरणी करू नये. महाराष्ट्रात सरासरीपेक्षा पाऊस कमीच राहणार आहे. एल निनोच्या प्रभावामुळे यंदा सरासरीपेक्षा ९० टक्के इतकाच पाऊस पडेल, असे सानप यांनी सांगितले.

पुण्यात पाऊस कधी कोसळणार?

IMD च्या ताज्या अंदाजानुसार पुणे आणि परिसरात पुढील २ ते ३ दिवसांत मेघगर्जना, विजांचा कडकडाट आणि हलक्या ते मध्यम स्वरूपाच्या पावसाची शक्यता आहे. हवामान विभागाने पुण्यासाठी यलो अलर्टही जारी केला असून, मान्सूनची पुढील प्रगती अनुकूल राहिल्यास 14 ते 16 जूनदरम्यान शहरात अधिक व्यापक पावसाची सुरुवात होऊ शकते. IMD ने यंदा पुण्यात मान्सून आगमनाबाबत काहीशी अनिश्चितता कायम असल्याचे सांगितले. त्यामुळे काही भागांत जोरदार सरी तर काही भागांत केवळ ढगाळ वातावरण राहण्याची शक्यता आहे.