उपमुख्यमंत्री एकनाथ शिंदे यांनी गोरेगाव नेस्को येथील दसरा मेळाव्यातून ठाकरे गट आणि विरोधकांवर जोरदार टीका केली. एकनाथ शिंदे यांनी पुन्हा एकदा शिवसेनेतील बंडखोरीचं समर्थन केलं. 'आपण जो निर्णय घेतला. बाळासाहेब असते तर त्यांनीही शिवसैनिकांची पाठ थोपटली असती, असं म्हणत उपमुख्यमंत्री एकनाथ शिंदे यांनी उद्धव ठाकरेंवर निशाणा साधला.

एकनाथ शिंदे यांच्या भाषणातील मुद्दे

आज आपण पाहतोय की बळीराजा संकटात आहे. बळीराजाच्या डोळ्यात अश्रू आहे. त्याचं दुःख मोठं आहे. शेती वाहून गेली आहे. त्याची जमीन खरडून गेली आहे. पशूधन वाहून गेलेय. घरांची पडझड झाली. स्वतः मी बांधावर जाऊन आलो. मी त्याचे दुख डोळ्याने पाहिले. अशा परिस्थितीत आपण मदतीचा हात दिला पाहिजे.

अनेक शिवसैनिक तिकडे मदत करतात. मदतीच्या गाड्या पोहोचतात. जिथे संकट तिथे शिवसेना, जिथं आपत्ती , तिथं शिवसेना जिथं संकट, तिथं तुमचा एकनाथ शिंदे धावून गेल्याशिवाय राहणार नाही हे आपलं धोरण आहे. मदतीचं तोरण हेच शिवसेनेचं धोरण आहे. जेव्हा आपत्ती येते तेव्हा शिवसेना धावून जाण्याचं काम करतेय.

महापुरामुळे बळीराजा कोलमडून गेला आहे. परंतु आपण सर्व त्याच्या पाठिशी आहोत. सरकार त्याच्या मागे आहे. म्हणून कुठल्याही अटी शर्ती बाजूला ठेवून मंत्रिमंडळात ठेवून मुख्यमंत्री आम्ही सगळ्यांनी ठरवलं की बळीराजाला मदतीचा हात, आधार दिला पाहिजे, आणि म्हणून जे काही या परिस्थितीत संकट मोठं आहे. लोक आम्हाला सांगत होते. अनेक वर्षांत आम्ही असा पाऊस, संकट पाहिलं नाही. सगळं उद्ध्वस्त झालं. आपण त्यांच्या मागे राहिलं पाहिजे. म्हणून हा निर्णय घेतला.

आपल्या मेळाव्यात आजूबाजूचे लोक आहेत, बाकीचे सगळे तिकडे मदत करतात. दसरा सण मोठा आहे. यावेळचा दसरा मात्र, पुराचं सावट आहे. संकट आहे. अशा परिस्थितीत आपला बळीराजा, अन्नदाता त्याच्या मागे उभं राहण्याचं काम शिवसेना करतेय.