पुण्यातील भिमाशंकरजवळील भिवेगाव येथील प्रसिद्ध देवकुंड धबधब्यात दोन जणांचा बुडून मृत्यू झाल्याची हृदयद्रावक घटना समोर आली आहे. सहा डॉक्टरांच्या टीमसह फिरायला आलेले सुबोध करंडे हे धबधब्याच्या परिसरात भटकंती करत असताना पाण्याच्या जोरदार प्रवाहात अडकले. तोल जाऊन ते खोल पाण्यात ओढले गेले आणि स्वतःला वाचविण्याचा प्रयत्न करूनही ते बाहेर पडू शकले नाहीत. अचानक घडलेल्या या घटनेने त्यांच्या सहकाऱ्यांसह उपस्थित पर्यटकांमध्ये खळबळ उडाली.

घटनेदरम्यान स्थानिक तरुण दिलीप वनघरे यांनी क्षणाचाही विलंब न करता पाण्यात उडी घेतली. मात्र, पाण्याचा जोरदार प्रवाह, खोल दरीसारखा पाणथळ भाग यामुळे त्यांनाही जीव वाचवणे शक्य झाले नाही. काही क्षणांतच दोघेही पाण्याखाली अदृश्य झाले. ही घटना पाहून नागिरीकांमध्ये आणि पर्यटकांमध्ये भीतीचे वातावरण निर्माण झाले होते.

स्थानिक नागरिकांनी आणि पर्यटकांनी मिळून तात्काळ रेस्क्यू ऑपरेशन सुरू केले. दोऱ्यांचा वापर करून आणि उपलब्ध साधनांनी पाण्यात शोध सुरू झाला. घटनेची माहिती मिळताच पोलिस आणि आपत्कालीन बचाव पथक घटनास्थळी दाखल झाले. काही तासांच्या प्रयत्नांनंतर दोघांचे मृतदेह बाहेर काढण्यात आले. त्यानंतर त्यांना रुग्णालयात नेण्यात आले, परंतु डॉक्टरांनी त्यांना मृत घोषित केले.

दरम्यान, याच दिवशी वसईच्या धुमाळ नगर भागात आणखी एक दुर्दैवी घटना घडली. १७ वर्षीय समशूल खान हा आपल्या ४-५ मित्रांसह पोहण्यासाठी स्थानिक विहिरीवर गेला होता. सर्व मित्र पोहून बाहेर आले, मात्र समशूल बाहेर आला नाही. मित्रांनी सुरुवातीला स्वतः शोधण्याचा प्रयत्न केला, पण अपयश आल्यावर त्यांनी तात्काळ पोलीस आणि अग्निशमन दलाला माहिती दिली.

या घटनांनी पर्यटकांनी आणि स्थानिकांनी पाण्याजवळ सावधगिरी बाळगण्याची गरज पुन्हा अधोरेखित केली आहे. निसर्गाच्या सान्निध्यात जाणे जरी आनंददायी असले, तरी त्यातील जोखमींकडे दुर्लक्ष केल्यास त्या क्षणात आयुष्य बदलून टाकणाऱ्या दुर्दैवी घटना घडू शकतात, याची जाणीव या दोन्ही अपघातांनी करून दिली आहे.