नितीन पाटणकर, साम टीव्ही

पुणे : विधानसभा निवडणुकीत महायुतीने महाविकास आघाडी आणि मनसेला धूळ चारली. विधानसभा निवडणुकीत मनसेला खातेही उघडता आलं नाही. विधानसभा निवडणुकीनंतर अनेकांनी निकालावर संशय व्यक्त केला. महाविकास आघाडीतील काही नेत्यांनाही निकाल मान्य केला नव्हता. त्यात आता मनसे अध्यक्ष राज ठाकरे यांचीही भर पडली आहे. राज ठाकरेंनीही विधानसभा निवडणुकीवर संशय व्यक्त केला. त्यावरून आता उपमुख्यमंत्री अजित पवार यांनी राज ठाकरे यांना टोला लगावला आहे.

पुण्यात उपमुख्यमंत्री अजित पवारांच्या उपस्थितीत पालकमंत्र्यांची जिल्हा नियोजन बैठक पार पडली. या बैठकीनंतर अजित पवारांनी माध्यमांशी संवाद साधला. यावेळी अजित पवारांनी विधानसभा निवडणुकीच्या निकालावर शंका घेणाऱ्या राज ठाकरेंवर निशाणा साधला.

अजित पवार म्हणाले, 'तुम्हाला तुमचा मुलगा निवडून आणता आला नाही. तुम्ही काय आम्हाला बोलता, लोकसभेत आम्हाला एक जागा मिळाली. तेव्हा आम्ही रडत नाही बसलो'.

लाडकी बहीण योजनेवर भाष्य करताना अजित पवार म्हणाले, 'लाडकी बहीण योजनेत आतापर्यंत महिलांना पैसे दिले आहेत, ते परत घेणार नाही. पुढील कालावधीसाठी पात्र लाभार्थी महिलांना लाभ देण्यासाठी सर्व्हे सुरु आहे'.

'डीपीडीसीसाठी सर्व जिल्ह्यांना मागील वेळेपेक्षा जास्त निधी देण्याचा आमचा प्रयत्न आहे. कृषी विभागातील खरेदी संर्दभात पुरावे असल्याशिवाय कारवाई होणार नाही. अंजली दमानिया आणि धनंजय मुंडे या दोघांनी आपली बाजू मांडली आहे. त्याची शहानिशा केली जाईल. त्यानंतर कारवाई केली जाईल, असे अजित पवार पुढे म्हणाले.

अभिनेते राहुल सोलापूरकर यांच्या वक्तव्यावर भाष्य करताना अजित पवार म्हणाले, राहुल सोलापूरकर यांच्याविरोधात पोलीसांकडे तक्रारी आल्या आहेत. राहुल सोलापूरकर यांनी शिवाजी महाराजाबद्दल असे विधान करायला नको होते. पोलीस त्याची तपासणी करून कारवाई करतील'.