संजय राठोड, यवतमाळ

यवतमाळमध्ये गर्भवती महिलेने आपल्या दोन वर्षांच्या चिमुकलीसह आत्महत्या केल्याची धक्कादायक घटना समोर आली आहे. सासरच्या जाचाला कंटाळून या महिलेनेहे टोकाचे पाऊल उचलले. यवतमाळच्या दारव्हा ब्रम्ही गावात ही घटना घडली. गर्भवती महिलेने आपल्या दोन वर्षाच्या मुलीसह विहिरीत उडी घेऊन आयुष्य संपवलं. या घटनेमुळे यवतमाळमध्ये खळबळ उडाली.

मिळालेल्या माहितीनुसार, पती, सासू आणि सासऱ्याच्या त्रासाला कंटाळून यवतमाळमध्ये गर्भवती महिलेने आपल्या दोन वर्षांच्या मुलीसह विहिरीत उडी मारून आत्महत्या केली. ही घटना यवतमाळच्या दारव्हा तालुक्यातील ब्रम्ही या गावात मंगळवारी घडली. पूजा मोहन नेमाने (२५ वर्षे) आणि काव्या मोहन नेमाने ( २ वर्षे) अशी आत्महत्या केलेल्या महिलेचे आणि तिच्या मुलीचे नाव आहे.

या घटनेची माहिती मिळताच पोलिसांनी घटनास्थळी धाव घेतली. महिलेसह तिच्या मुलीचा मृतदेह विहिरीतून बाहेर काढून शवविच्छेदनासाठी रुग्णालयामध्ये पाठवण्यात आला. या प्रकरणी लाडखेड पोलिस ठाण्यात पती मोहन रोडबा नेमाने, सासू रंजना रोडवा नेमाने आणि सासरे रोडबा नेमाने या तिघांविरोधात विविध कलमान्वये गुन्हा दाखल करण्यात आला. या प्रकरणी मृत पूजाचे वडील गुलाब ज्योतीराम शिंदे यांनी तक्रार दिली होती. या तक्रारीनंतर पोलिसांनी आरोपींविरोधात गुन्हे दाखल केले. पोलिस सध्या या घटनेचा तपास करत आहेत.

दरम्यान, ठाण्यामध्ये देखील एका महिलेने आत्महत्या केल्याची घटना घडली. ठाण्यातील कळवा पुलावरून या महिलेने खाडीत उडी मारली. घटनेची माहिती मिळताच अग्निशमन दलाचे कर्मचारी आणि पालिका कर्मचाऱ्यांनी घटनास्थळी धाव घेतली. अंधारात त्यांनी खाडीतून महिलेचा मृतदेह शोधून काढत बाहेर आणला. या महिलेचा मृतदेह शवविच्छेदनासाठी कळवा रुग्णालयात पाठवण्यात आला आहे. या महिलेची ओळख अद्याप पटली नाही. कळवा पोलिस सध्या या प्रकरणाचा तपास करत आहेत.