Accident: महामार्गावर अपघाताचा थरार! भरधाव ट्रकची कारला धडक, २ जवानांसह ५ जणांचा मृत्यू

Summary -

• छत्तीसगडमध्ये भयंकर अपघात झाला

• कार-ट्रकची समोरासमोर धडक होऊन ५ जणांचा मृत्यू

• अपघातामध्ये ३ जण गंभीर जखमी झालेत

• अपघातानंतर ट्रक चालक फरार झाला असून पोलिसांकडून शोध सुरू आहे

छत्तीसगडमध्ये भीषण अपघाताची घटना घडली. भरधाव ट्रकने कारला धडक दिली. या अपघातामध्ये ५ जणांचा जागीच मृत्यू झाला. मृतांमध्ये २ जवानांचा समावेश आहे. छत्तीसगडच्या जांजगीर-चांपा जिल्ह्यातील सुकली गावाच्या हद्दीत राष्ट्रीय महामार्गावर हा अपघात झाला. नवागड येथून लग्नाला गेलेले वऱ्हाडी कारने परत येत होते. याचवेळी कार आणि ट्रकची समोरासमोर धडक झाली. या अपघाामध्ये ५ जणांचा मृत्यू तर ३ जण गंभीर जखमी झाले आहेत. जखमींवर रुग्णालयात उपचार सुरू आहेत.

नवागडमध्ये राहणारे ८ जण कारने पंतोरी गावात लग्नासाठी जात होते. लग्नानंतर हे सर्वजण परत जात होते. त्याचवेळी सुकली गावाजवळ भरधाव कारला ट्रकने धडक दिली. हा अपघात इतका भीषण होता की यामध्ये कारचा चक्काचूर झाला. कारमधील ५ जणांचा जागीच मृत्यू झाला. तर ३ जण गंभीर जखमी झाले. जखमींना तात्काळ रुग्णालयात दाखल करण्यात आले.

गंभीर जखमी झालेल्या तीन जणांना पुढील उपचारांसाठी बिलासपूर येथे पाठवण्यात आले. अपघातात मृत्यू झालेल्यांमध्ये दोन लष्करी जवानांचा समावेश असल्याचे सांगण्यात येत आहे. त्यापैकी एकाचे काही दिवसांपूर्वीच लग्न झाले होते. सर्व मृत आणि जखमी नवगढमधील एकाच परिसरातील रहिवासी होते. ज्यामुळे संपूर्ण परिसरात शोककळा पसरली. जिल्हा रुग्णालयात नातेवाईक आणि ग्रामस्थांची मोठी गर्दी केली होती. अपघातानंतर ट्रक चालक वाहन सोडून घटनास्थळावरून पळून गेला. पोलिसांनी घटनास्थळाची पाहणी करून गुन्हा दाखल केला आहे आणि आरोपी चालकाचा शोध सुरू केला आहे.