- विनायक वंजारे

सावंतवाडी तालुक्यातील बांदा शहरात गडगेवाडी येथील ओहळात कपडे धुण्यासाठी गेलेल्या महिलेच्या अंगावर विद्युत तारा तुटून पडल्याने महिलेचा जागीच दुर्देवी मृत्यू झाला. विद्या वामन बिले (वय ६०) असे मृत्यूमुखी पडलेल्या महिलेचे नाव आहे. दरम्यान मृताच्या वारसांना रोख भरपाई न दिल्यास मृतदेह सावंतवाडी वीज वितरणच्या कार्यालयात नेणार असा इशारा बांधा ग्रामस्थांनी प्रशासनास दिला.

या घटनेनंतर बांदा ग्रामस्थ आक्रमक झाले. या घटनेला महावितरण जबाबदार असल्याचा आरोप ग्रामस्थांनी केला आहे. यावेळी मयताच्या वारसांना रोख दहा लाख रुपये भरपाई द्या अशी मागणी ग्रामस्थांनी केली.

वीज वितरणचे तालुका अभियंता येईपर्यंत मृतदेहाला हात लावू देणार नाही असा प्रवित्रा ग्रामस्थांनी घेतला. अखेर पोलिसांनी मध्यस्थी केल्या नंतर महावितरणच्या अधिकाऱ्यांनी नुकसान भरपाई देण्याचे मान्य केले. त्यानंतर त्या महिलेचा मृतदेह ताब्यात घेण्यात आला.

Edited By : Siddharth Latkar