चेतन व्यास, वर्धा

Wardha POCSO Case Filed Against NCP Leader Diwakar Game वर्धा जिल्ह्यातून ‘जागतिक महिला दिना’च्या दिवशी समाजाला हादरवून टाकणारी ही घटना उघडकीस आली आहे. राष्ट्रवादी अजित पवार गटाशी संबंधित एका ज्येष्ठ नेत्यावर तरुणीकडे दीर्घकाळ शरीर सुखाची मागणी केल्याचा गंभीर आरोप झाला आहे. दिवाकर गमे (वय ७८ ) असे या आरोपीचे नाव असून पुलगाव पोलिसांनी त्याला अटक केली आहे. पीडित तरुणीच्या तक्रारीवरून पुलगाव पोलिस ठाण्यात पॉक्सो कायद्याअंतर्गत आणि इतर गंभीर कलमान्वये गुन्हा दाखल करण्यात आला आहे.

पोलिसांच्या प्राथमिक माहितीनुसार, पीडित तरुणी २०२२ मध्ये अवघ्या २१ वर्षांची असताना आरोपीने तिला नोकरीचे आमिष दाखवत, गेल्या सुमारे पाच वर्षांपासून तिच्याकडे सातत्याने शरीर सुखाची मागणी केल्याचा आरोप आहे. धक्कादायक बाब म्हणजे आरोपीचे पीडित मुलीच्या कुटुंबाशी जवळचे संबंध असल्याची माहितीही समोर आली आहे.

तसेच तीन दिवसांपूर्वी आरोपीने पीडितेला अश्लील फोटो आणि व्हिडिओ पाठवून छळ केल्याचा आरोप आहे. यामुळे त्रस्त झालेल्या पीडित तरुणीने अखेर पोलिसांकडे धाव घेत तक्रार दाखल केली. तक्रार मिळताच पुलगाव पोलिसांनी घटनेचे गांभीर्य ओळखत ७ मार्चच्या सायंकाळी आरोपी दिवाकर गमे याला अटक केली. पोलिसांनी आरोपीचा मोबाईलही जप्त केला असून त्यातून आणखी धक्कादायक पुरावे समोर येण्याची शक्यता वर्तवली जात आहे.

दरम्यान, आरोपी हा राष्ट्रवादीच्या अजित पवार गटाशी संबंधित एका दिग्गज नेत्याचा निकटवर्तीय असल्याची माहिती समोर येत असून या प्रकरणामुळे जिल्ह्यात खळबळ उडाली आहे.या संपूर्ण प्रकरणाचा तपास उपविभागीय पोलीस अधिकारी करत असल्याची माहिती पोलिसांकडून देण्यात आली आहे.