बीड जिल्ह्यातील मस्साजोगचे सरपंच संतोष देशमुख यांच्या हत्येने संपूर्ण महाराष्ट्र हादरला होता. या हत्येच्या वेळी आरोपींनी संतोष देशमुख यांच्यावर अमानुष अत्याचार केल्याचं समोर आलं होतं. आता छत्रपती संभाजीनगर जिल्ह्यातील वैजापूरमध्येही अशाच प्रकारची संतापजनक घटना घडल्याचा आरोप करण्यात आला आहे. जुन्या वादातून रोहित पठारे या तरुणाला मारहाण करण्यात आली. इतकंच नाही तर पाणी मागितल्यावर त्याच्या तोंडावर लघुशंका केल्याचा गंभीर आरोप आहे. या हत्या प्रकरणानंतर परिसरात संतापाचे वातावरण निर्माण झाले आहे. आज मंत्री संजय शिरसाट मृत रोहित पठारेच्या कुटुंबियांची भेट घेऊन त्यांचं सांत्वन केलं.

यावेळी कुटुंबीयांनी आपला आक्रोश व्यक्त करत आरोपींना फाशीची शिक्षा देण्याची मागणी केली. तसेच आरोपींना मदत करण्यात आली आणि पोलिसांनी सुरुवातीला तक्रार घेण्यास टाळाटाळ केली, असा गंभीर आरोपही कुटुंबीयांनी केला. त्यामुळे पोलिसांच्या भूमिकेवरही प्रश्नचिन्ह उपस्थित झालं आहे.

दरम्यान, या प्रकरणाची गंभीर दखल घेत पालकमंत्र्यांनीही पोलिसांच्या तपासावर प्रश्न उपस्थित केले. त्यानंतर या प्रकरणाचा तपास वरिष्ठ पोलीस अधिकाऱ्यांकडे सोपवण्यात आला आहे. आतापर्यंत तीन आरोपींना अटक करण्यात आली असून, इतर आरोपींचा शोध घेण्यासाठी पोलिसांची पाच पथकं रवाना करण्यात आली आहेत.

दुसरीकडे, पीडित कुटुंबाला सामाजिक न्याय विभागाच्या माध्यमातून पाच लाख रुपयांची तातडीची आर्थिक मदत देण्याची घोषणा पालकमंत्र्यांनी केली. आरोपींना कठोरात कठोर शिक्षा होईपर्यंत पाठपुरावा करू, अशा घटना खपवून घेतल्या जाणार नाहीत, असा इशाराही त्यांनी दिला.