Thane : ऐन दिवाळीत ठाणे ATS ची मोठी कारवाई; १० लाखांचे बक्षीस असलेला झारखंडचा नक्षलवादी अटकेत

ऐन दिवाळीत ठाणे दहशतवादविरोधी पथकाने (ATS) मोठी कारवाई केली आहे. झारखंडमध्ये अनेक गुन्ह्यांमध्ये सहभागी असल्याचा आरोप असलेल्या आणि फरार असलेल्या एका नक्षलवाद्याला पोलिसांनी अटक केली आहे. विशेष म्हणजे, या नक्षलवाद्याला पकडण्यासाठी झारखंड सरकारने तब्बल १० लाख रुपयांचे बक्षीस जाहीर केले होते.

संजय सरोज यादव उर्फ संजय गोधरे उर्फ बुधाराम असे अटक करण्यात आलेल्या नक्षलवाद्याचे नाव आहे. तो ४५ वर्षांचा असून झारखंडमधील पलामू जिल्ह्यातील देवगन गावचा रहिवासी असल्याची माहिती समोर आली आहे. डोंबिवलीजवळील ठाकुर्ली परिसरातून ATS च्या पथकाने त्याला ताब्यात घेतले.

ऐन दिवाळीत ही कारवाई करण्यात आल्याने पोलिस यंत्रणांमध्ये मोठी खळबळ उडाली आहे. झारखंडमध्ये फरार असलेला आणि मोठे बक्षीस जाहीर झालेला नक्षलवादी महाराष्ट्रात नेमका कशासाठी आला होता, याबाबत आता प्रश्न उपस्थित होत आहेत. दिवाळीच्या काळात एखादा घातपात घडवण्याच्या उद्देशाने तो ठाणे जिल्ह्यात आला होता का, याचाही तपास ATS कडून केला जात आहे. त्याच्यासोबत आणखी कोणाचे संबंध आहेत का, तसेच महाराष्ट्रात त्याचे काही साथीदार आहेत का, याचीही माहिती तपास यंत्रणा घेत आहेत.

या अटकेमुळे झारखंडमधील नक्षलवादी कारवायांशी संबंधित आणखी काही महत्त्वाची माहिती समोर येण्याची शक्यता आहे. अटकेनंतर आरोपीला लवकरच ठाणे न्यायालयात हजर केले जाणार असल्याची माहिती मिळत आहे. दरम्यान, ATS च्या या कारवाईमुळे दिवाळीच्या काळात सुरक्षेचा प्रश्न पुन्हा चर्चेत आला आहे.