अजय दुधाणे, साम प्रतिनिधी

उल्हासनगरमध्ये शिवसेनेच्या शिंदे गटातील अंतर्गत नाराजी चव्हाट्यावर आली आहे. पक्षाचे 200 हून अधिक पदाधिकारी आणि कार्यकर्ते जाहीर राजीनामे देण्याच्या तयारीत असल्याने राजकीय वर्तुळात खळबळ उडाली आहे. प्रभाग क्रमांक 10 मध्ये शिवसैनिकांनी शाखेसमोर जोरदार निदर्शने करत “स्थानिक उमेदवारांना प्राधान्य द्या, उमेदवार आयात करू नका” या मागणीसाठी आंदोलन केले. यावेळी घोषणाबाजीही करण्यात आली.

गेल्या निवडणुकीत या प्रभागातून आयात केलेल्या उमेदवाराला तिकीट देऊन नगरसेवक बनवल्याचा आरोप शिवसैनिक करत आहेत .मात्र त्यांच्या संपूर्ण पाच वर्षांच्या कार्यकाळात ते ना प्रभागात दिसले, ना नागरिकांच्या समस्यांकडे लक्ष दिले. स्थानिक कार्यकर्त्यांकडे पूर्णपणे दुर्लक्ष करण्यात आले, त्यामुळे पक्षाच्या तळागाळातील कार्यकर्त्यांमध्ये प्रचंड नाराजी आहे.

या पार्श्वभूमीवर आगामी महापालिका निवडणुकीत स्थानिक आणि कष्टाळू शिवसैनिकांनाच उमेदवारी द्यावी, अशी मागणी आता शिवसैनिकांनी केली आहे. वरिष्ठ नेतृत्वाने ही मागणी मान्य न केल्यास या प्रभागातील सर्व 200 च्या वर पदाधिकारी एकत्र राजीनामा देतील असा इशारा पदाधिकाऱ्यांनी दिला आहे. या घडामोडींमुळे उल्हासनगरमधील शिवसेना शिंदे गटासाठी मोठे राजकीय संकट निर्माण झाले आहे.आता या नाराजीवर पक्षाचे वरिष्ठ नेतृत्व काय भूमिका घेते याकडे सर्वांचे लक्ष लागले आहे.