Maharashtra Election: सोलापुरात भाजपला डच्चू; शिवसेनेची राष्ट्रवादीसोबत युती; फॉर्म्युलाही ठरला

राज्यातील महापालिका निवडणुकांचे वारे वाहत आहे. अनेक ठिकाणी नव-नवीन युती आणि आघाडी बनत आहेत. काही महापालिका क्षेत्रात युती आणि आघाड्यांचं गणित बिघडलंय. त्यामुळे अशा ठिकाणी वेगळीच युती पाहायाला मिळतेय. पुणे, पिंपरी चिंचवडनंतर आता सोलापुरतही भाजप राष्ट्रवादी काँग्रेस-शिवसेना महायुतीचं गणित कोलमडलंय. त्यानंतर आता सोलापुरात महायुतीमध्येच वाद पेटलाय. येथे भाजपला डालवत एकनाथ शिंदेंची शिवसेना अजितदादांच्या राष्ट्रवादीची युती होणार आहे.

सोलापूर महापालिकेत शिवसेना आणि राष्ट्रवादीचा १०२ जागांपैकी ५१-५१ जागांचा फॉर्म्युला ठरलाय. दरम्यान भाजपकडून सन्मानजनक जागा न दिल्याने शिंदे गटाने राष्ट्रवादीसोबत जाणं पसंत केलं. राष्ट्रवादीचे संपर्क मंत्री दत्तात्रय भरणे आणि शिवसेना शिंदे गटाचे नेते माजी मंत्री सिद्धाराम म्हेत्रे यांच्यात युतीबाबत चर्चा झाली. सोलापूर महापालिकेसाठी जागा वाटपाच्या मुद्यावरून भाजप आणि शिवसेना शिंदे गटामध्ये युतीची बोलणीतून काहीच मार्ग निघत नव्हता.

शेवटी शनिवारी कृषिमंत्री दत्तात्रय भरणे यांच्या दौऱ्यानंतर राष्ट्रवादी आणि शिवसेना युतीच्या हालचालींनी वेग पकडला. आज शिवसेना शिंदे गट आणि राष्ट्रवादी अजित पवार गटाची बैठक पार पडली. त्यामध्ये युतीची घोषणा करण्यात आली. शिवसेना नेते सिद्धाराम म्हेत्रे यांनी पत्रकार परिषदेतून याबाबत माहिती दिली. यासह त्यांनी जागावाटपाचा फॉर्म्युलाही सांगितला. आमच्याकडे शिवसेना-राष्ट्रवादी, अशी दोघांची युती झाली.

५० टक्के समान जागा वाटपाचा निर्णय झाला. महापालिकेच्या १०२ जागांपैकी ५१-५१ जागा दोघांच्या वाट्याला येणार आहेत. दोघांचाही महापौर सोलापूर महापालिकेत असतील. राज्याच्या सत्तेतदेखील आम्ही सोबत आहोत. याशिवाय नगरविकास आणि अर्थ खाते राज्यात आमच्या नेत्यांकडे आहे. त्याचा वापर करून सोलापूरचा मोठा विकास आम्ही करू, असे सिद्धाराम म्हेत्रे म्हणालेत.